პორტალი ადამიანის უფლებების შესახებ

15 იანვარს სასტუმრო „ამბასადორში“ „უფლებადამცველთა სამხრეთკავკასიურმა ქსელმა“, არასამთავრობო ორგანიზაციათა კოალიციამ „სამოქალაქო მანიფესტი“ და „საქართველოს ახალგაზრდა იურისტთა ასოციაციამ“ მრგვალი მაგიდა გამართა.

სიღნაღის პოლიციის თანამშრომლებმა - ლევან ხარატიშვილმა და ოთარ თოფჩიშვილმა ქალაქ წნორში მცხოვრები 23 წლის გურამ გურამის ძე ბაგალიშვილი სასტიკად ცემეს. ბაგალიშვილს ცეცხლსასროლი იარაღი ჩარტყმით თავი სამ ადგილას გაუტეხეს. დაზარალებულს ასევე აღენიშნება დაჟეჟილობები მარჯვენა თვალბუდისა და თხემის არეში. არსებობს ყველა მტკიცებულება, რითაც დასტურდება, რომ პოლიციის თანამშრომლების მხრიდან ადგილი ჰქონდა ხულიგნობას, ცემას და სამსახურებრივი უფლებამოსილების ბოროტად გამოყენებას. თუმცა, ისინი ამ დრომდე არ დაუკავებიათ.  

მუხროვანის ამბოხში ბრალდებულთა განაჩენი თბილისის საქალაქო სასამართლომ 11 იანვარს გამოიტანა. სახელმწიფო გადატრიალებისა და სამხედრო ამბოხში მონაწილეობის ბრალდებით 2009 წლის მაისში სულ 41სამხედრო და სამოქალაქო პირი დააკავეს. მათგან 20, სასამართლო განხილვის სხვადასხვა ეტაპზე, ბრალის აღიარების შემდეგ, საპროცესო შეთანხმებებისა და გირაოს გადახდის საფუძველზე, გაათავისუფლეს.