პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ელენე თევდორაძეს აინტერესებს, აღიძრა თუ არა სისხლის სამართლის საქმე იმ პოლიციელების წინააღმდეგ, რომლებმაც 7 ნოემბერს ოპოზიციის საპროტესტო აქციის დაშლისას უფლებამოსილებას გადაამეტეს.
საქმის მოსალოდნელი აღძვრის შესახებ საქართველოს პრეზიდენტმა მიხეილ სააკაშვილმა განაცხადა.
როგორც ელენე თევდორაძემ პარლამენტის დღეს გამართულ ბიუროს სხდომაზე განაცხადა, სააკაშვილის ამ განცხადების შემდეგ მას შეკითხვებით უამრავი ადამიანი დაუკავშირდა, „ბიუროს ან კომიტეტის სახელით ხომ არ გავგზავნოთ წერილი პროკურატურაში და შესაბამისი ინფორმაცია მოვითხოვოთ?“, - იკითხა დეპუტატმა.
როგორც პარლამენტის თავმჯდომარის მოვალეობის შემსრულებელმა მიხეილ მაჭავარიანმა განაცხადა, წერილის გაგზავნა საჭირო არ არის, რადგან ამ საკითხს ის თავად გაარკვევს და სათანადო ინფორმაციას თევდორაძეს 29 ნოემბრის რიგგარეშე სესიაზე გააცნობს.
წყარო: მედიანიუსი