გორში სკოლის დირექტორები "კავეენების" გამო დასაჯეს

გორის მუნიციპალიტეტის გამგეობაში გორის საჯარო სკოლების დირექტორები დაიბარეს და სკოლებში "კავეენების" ცენზურა მკაცრად მოსთხოვეს. როგორც "ადამიანის უფლებათა ცენტრს" სკოლის პედაგოგებმა აცნობეს, ხელისუფლებას თურმე არ მოსწონებია  "კავეენზე" მოსწავლეების მხრიდან მაღალჩინოსნების გამასხარავება.

წინასაარჩევნო პერიოდთან დაკავშირებით, გორის მუნიციპალიტეტის ინიციატივით ქალაქის სკოლებში მხიარულთა და საზრიანთა კლუბის თამაშები ერთი კვირაა მიმდინარეობს.

როგორც გავარკვიეთ, ჟიურის წევრებს, რომლის შემადგენლოებაში შედიოდნენ მუნიციპალიტეტის, მოსწავლე-ახალგაზრდობის სასახლის, რადიო "თრიალეთის" წარმომადგენლები, მოთამაშეებს ნომრები დაუწუნეს. ამის გამო მკაცრი საყვედური სკოლის დირექტორებმა მიიღეს.

მუნიციპალიტეტის გამგებლის მოადგილე ზურაბ ჩხეიძე "ადამიანის უფლებათა ცენტრთან" საუბარში აღნიშნავს, რომ სკოლის დირექტორებმა მხოლოდ შენიშვნა მიიღეს იმასთან დაკავშირებით, რომ წარმოდგენილ ნომრებში მოსწავლეები უხამს სიტყვებს ხმარობდნენ. გამგებლის მოადგილე გვარწმუნებს, რომ ხელისუფლების აღშფოთება "კავეენშჩიკების" მხრიდან მაღალჩინოსნების გაშარჟებას არ მოჰყოლია.

საბა წიწიკაშვილი, გორი