გურჯაანის რაიონული სასამართლოს მოსამართლე ლია ოთარაშვილმა, გურჯაანის საჯარო სკოლის დირექტორს საჯარო ინფორმაციის დაუყოვნებლივ გაცემა დაავალა.
საჯარო ინფორმაციის გაცემის მოთხოვნით სასამართლოს "ადამიანის უფლებათა ცენტრის" წარმომადგენლებმა მიმართეს. არასამთავრობო ორგანიზაცია სკოლაში საჯარო ინფორმაციის გაცემაზე პასუხისმგებელი პირისგან ბიუჯეტის ხარჯვის და პედაგოგების გათავისუფლების შესახებ ითხოვდა ინფორმაციას, რაც დირექტორმა მარინა უტიაშვილმა დაბლოკა.
დასაბუთებული გადაწყვეტილების მიღების შემდეგ "ადამიანის უფლებათა ცენტრი" მიმართავს გურჯაანის საჯარო სკოლის სამეურვეო საბჭოს, საქართველოს ზოგადი ადმინისტრაციული კოდექსით დადგენილი მოთხოვნების სისტემატური და უხეში დარღვევისათვის, სკოლის დირექტორს დისციპლინური პასუხისმგებლობა დააკისროს და თანამდებობიდან გაათავისუფლოს.
გელა მთივლიშვილი, კახეთი