საქართველოს სახალხო დამცველმა სოზარ სუბარმა საქართველოს პრეზიდენტს საქართველოს იუსტიციის სამინისტროს სასჯელაღსრულების დეპარტამენტის ქ.თბილისის #5 ქალთა და არასრულწლოვანთა დაწესებულებაში მყოფი მსჯავრდებულის ქალბატონ მარინა ქ.-ს შეწყალების თხოვნით მიმართა.
სახალხო დამცველი დარწმუნებულია, რომ საქართველოს პრეზიდენტი გულისყურით მოეკიდება მარინა ქ.-ს ოჯახურ ტრაგედიას და ნებას დართავს მას, თავად იზრუნოს დარჩენილი ორი შვილის აღზრდაზე.
მარინა ქ. ოთხი შვილის დედაა. 2003 წელს მისი ერთ-ერთი შვილი - ექვსი წლის გიორგი კ. - გარდაიცვალა ინტოქსიკაციით, რადგან ოჯახის მძიმე ეკონომიკური მდგომარეობის გამო მას ნაგავსაყრელზე უხდებოდა საკვების ძებნა.
2006 წლის 10 აგვისტოს მარინა ქ. ჯართის - საქართველოს რკინიგზის კუთვნილის ვაგონებიდან 259 ლარის ღირებულების ლითონის დეტალების - ქურდობისთვის დააკავეს. მას 4 წლით თავისუფლების აღკვეთა მიესაჯა. მისი სამი შვილი იზრდებოდა მარინა ქ.-ს მეუღლის მამიდის ცირა ხ.-ს და ბებიის, ვარა კ.-ს მეთვალყურეობის ქვეშ. 2008 წლის 8 აგვისტოს ქ.გორზე განხორციელებული რუსული ავიაიერიშის დროს ჭურვი დაეცა ვარა კ.-ს სახლს (ქ.გორი, ხახუტაშვილის ქ.#4), რის შედეგადაც ვარა კ. და მარინა ქ.-ს 13 წლის შვილი მერაბ კ. ადგილზე დაიღუპნენ, ნანგრევებიდან მათი გვამების სრულად გამოტანა დღემდე ვერ ხერხდება. დაბომბვის შედეგად 4 წლის ლიკა კ.-მ მიიღო მეორე და მესამე ხარისხის დამწვრობა.
ამ საშინელი ტრაგედიის შემდეგ, მარინა ქ.-ს ორი მცირეწლოვანი შვილი პრაქტიკულად უპატრონოდაა დარჩენილი. სახალხო დამცველმა თავი ვალდებულად მიიჩნია პირადად მიემართა საქართველოს პრეზიდენტისთვის მარინა ქ.-ს შეწყალების თხოვნით. აღსანიშნავია, რომ აღნიშნულ პიროვნებას უკვე მოხდილი აქვს სასჯელის ნახევარი, ხოლო იმ პერიოდში, რაც მან სასჯელაღსრულების დაწესებულებაში გაატარა, სანიმუშო ყოფაქცევით გამოირჩეოდა, რის გამოც ორი მადლობა აქვს მიღებული.
წყარო: www.ombudsman.ge