შს სამინისტროს საკადრო და ორგანიზაციული უზრუნველყოფის დეპარტამენტის იურიდიულმა სამმართველომ წარმოებაში მიიღო ჟურნალისტ გელა მთივლიშვილის ადმინისტრაციული საჩივარი შს კახეთის სამხარეო მთავარი სამმართველოსა და ახმეტის რაიონული სამმართველოსთვის ქმედების განხორციელების – საჯარო ინფორმაციის გაცემის დავალდებულების შესახებ.
ჟურნალისტმა შს ახმეტის რაიონულ სამმართველოს განცხადებით 2008 წლის 2 სექტემბერს მიმართა და მოითხოვა მისთვის მიეწოდებინათ ინფორმაცია 2008 წელს შს ახმეტის სამმართველოს მიერ რამდენ სისხლის სამართლის საქმეზე შეწყდა გამოძიება და რის საფუძველზე. შს კახეთის სამხარეო მთავარი სამმართველოს უფროსმა ჟურნალისტს კანონით დადგენილი ვადების დარღვევით უპასუხა, რომ ინფორმაციის თავისუფლება შს ორგანოებზე არ ვრცელდება. პოლიციის სამხარეო სამმართველოს პასუხი ჟურნალისტმა შს სამინისტროში გაასაჩივრა.
შს სამინისტროს იურიდიული სამმართველო ჟურნალისტის ადმინისტრაციულ საჩივარს დღეს, 19 ნოემბერს, 16 საათზე განიხილავს.
,,ადამიანის უფლებათა ცენტრი“