დიმიტრი ლორთქიფანიძე 15 ივნისს დაკავებული ახალგზარდების გათავისუფლებას ითხოვს

საპარლამენტო ოპოზიციის წარმომადგენელი დიმიტრი ლორთქიფანიძე პოლიციის სამმართველოსთან 15 ივნისს დაკავებული ახალგაზრდების გათავისუფლებას ითხოვს.

ამის შესახებ ლორთქიფანიძემ დღევანდელ რიგგარეშე სხდომაზე განაცხადა და არგუმენტად მათი სასჯელის მოხდის პირობები დაასახელა. დეპუტატის თქმით, დაკავებულებს ადმინისტრაციული სასჯელი აქვთ შეფარდებული და წინასწარი დაკავების იზოლატორში იმყოფებიან, რითაც ირღვევა როგორც სისხლის სამართლის საპროცესო კოდექსი, ისე - ადამიანის ელემენტარული უფლება, ჰქონდეთ ძილის, ჰიგიენის, თუნდაც განათლების საშუალება.

დიმიტრი ლორთქიფანიძის განმარტებით, იზოლატორში ადამიანების ყოფნა დასაშვებია მხოლოდ 72 საათი, მათ კი იქ დარჩენა 30 დღე მოუწევთ.

დეპუტატმა ხაზი გაუსვა, იმასაც, რომ დღეს წამების მსხვერპლთა მხარდაჭერის დღეა და მიმართა დეპუტატებს, ერთობლივად სთხოვონ პრეზიდენტს, 15 ივნისს დაკავებული ახალგაზრდების გათავისუფლება, მითუმეტეს, რომ მათ სასჯელის გარკვეული ნაწილი უკვე მოიხადეს.

წყარო „ინტერპრესნიუსი“