დაკავებულია ლეიბორისტული პარტიის მცხეთა მთიანეთის ორგანიზაციის ხელმძღვანელი კოტე წამალაძე - ამის შესახებ დღეს გამართულ პრესკონფერენციაზე, ლეიბორისტული პარტიის წევრმა პაატა ჯიბლაძემ განაცხადა.
წამალაძე 24 ივნისს დააკავეს და მას ბრალად ნარკოტიკების შენახვა ედება - განაცხადა ჯიბლაძემ. მისი ინფორმაციით, წამალაძეს ორთვიანი პატიმრობა მიესაჯა და გლდანის ციხეშია გადაყვანილი.
ლეიბორისტები აღნიშნულ ქმედებას წამალაძის პოლიტიკურ საქმიანობას უკავშირებენ და ხელისუფლებას ბრალს პოლიტიკურ ანგარიშსწორებაში სდებენ.
ჯიბლაძე სახალხო დამცველს მოუწოდებს გამოითხოვოს წამალაძესთან არსებული ყველა დოკუმენტი და მიიღოს ყველა ზომა პოლიტიკური ნიშნით დაკავებულის დასახმარებლად.
წყარო: „ინტერპრესნიუსი“