ცოტა ხნის წინ ინციდენტი მოხდა დედოფლისწყაროს მუნიციპალიტეტის გამგეობის შენობაში. რამდენიმე უმწეო ადამიანმა, რომლებიც უფასო სასადილოში იკვებებიან, სადილის კუთვნილი წილი გამგეობის სოციალური დახმარების სამსახურის უფროსს ლევან ჯამალაშვილს სამუშაო ოთახში მიუტანეს.
უმწეო მოხუცების თქმით, სადილი ყოველდღიურად უარესდება, გარდა ამისა, სასადილოს ხელმძღვანელები მათ ულუფას უმცირებენ, დარჩენილი საკვები კი სახლებში მიაქვთ და ღორებს აჭმევენ.
მოხუცები იმასაც ამბობენ, ადგილობრივი ბიუჯეტიდან უფასო სასადილოს დაფინანსება არ შემცირებულა, თუმცა გამგეობის გადაწყვეტილებით, ისინი შაბათობით ვეღარ სადილობენ.
მოხუცების ბრალდებებს დედოფლისწყაროს მუნიციპალიტეტის გამგეობის სოციალური დახმარების სამსახურის უფროსი ლევან ჯამალაშვილი არ ადასტურებს. იგი ასევე უარყოფს ინფორმაციას იმის შესახებ, რომ გამგეობის შენობაში მისულ უკმაყოფილო მოხუცებს ჩინოვნიკები სასადილოდან გაგდებით დაემუქრნენ.
წყარო: კახეთის საინფორმაციო ცენტრი