ბაკურციხის მოსახლეობა პროტესტის ნიშნად გურჯაანი - თბილისის ავტომაგისტრალის გადაკეტვას აპირებს

გურჯაანის რაიონის სოფელ ბაკურციხის მოსახლეობა დღეს, საღამოს, პროტესტის ნიშნად, გურჯაანი - თბილისის ცენტრალური ავტომაგისტრალის გადაკეტვას აპირებს.

როგორც კახეთის საინფორმაციო ცენტრს ბაკურციხის მაცხოვრებლებმა აცნობეს, მოსახლეობა სოფელში სარწყავი სისტემის მილების ამოღებას და ჯართად გაყიდვას აპროტესტებს. მათი თქმით, მილების ამოღების შედეგად ვენახებში მისასვლელი გზები მთლიანად გადათხრილია და მოძრაობა შეუძლებელია. გარდა ამისა, მათივე თქმით, მილებში სარწყავი წყალი მიედინებოდა და მისი ამოღების შემდეგ ნაკვეთებს ვეღარ რწყავენ.

ბაკურციხილების ცნობით, მილების ამოღების უკან გურჯაანის საკრებულოს წევრი თამაზ აბრამიშვილი დგას, რომელიც საპარლამენტო უმრავლესობის ლიდერის პეტრე ცისკარიშვილის  ახლობელია და ის ლობირებს.

თამაზ აბრამიშვილი მოსახლეობის ბრალდებებს არ ადასტურებს.
გურჯაანის მუნიციპალიტეტის გამგებელმა გიორგი ჩივიაშვილმა კი განაცხადა, რომ სარწყავი სისტემის მილები აუქციონის წესით ორი თვის წინ გაიყიდა და ის კერძო პირებმა შეიძინეს.

კახეთის საინფორმაციო ცენტრი