აფხაზეთის ავტონომიური რესპუბლიკის განათლებისა და კულტურის მინისტრი დალი ხომერიკი გალის რაიონის ქართველ მასწავლებლებზე სეპარტისტებისა და ოკუპანტების ზეწოლას აპროტესტებს.
დღეს გამართულ პრესკონფერენციაზე დალი ხომერიკმა განაცხადა, რომ გალის რაიონში სწავლის დაწყებამდე რამდენიმე დღით ადრე, სასწავლო პროცესის ჩასაშლელად სეპარტისტები და ოკუპანტები ქართული სკოლის პედაგოგებსა და მშობლებზე გარკვეულ ზეწოლას ახორციელებდნენ.
კერძოდ, ქართული ენის გაძლიერებული სწავლების გამო სოფელ სიდის სკოლის დირექტორი გულიადა სიჭინავა, რამდენიმე პედაგოგთან და სკოლის ადმინისტრაციის წარმომადგენელთან ერთად, სამსახურიდან გაათავისუფლეს.
„გვინდა, მადლობა გადავუხადოთ გალის რაიონში მცხოვრებ ქართულ მოსახლეობას და პედაგოგებს, რომელებიც თავდადების შედეგად უკიდურესად რთულ ვითარებაში ქართული ენის სწავლებასა და საქართველოს მოქალაქეობის შენარჩუნებას ახერხებენ. აფხაზეთის სკოლებში გაცემულ ატესტატებში მშობლიურ ენად რუსული იწერება. ოკუპანტების ასეთი სტრატეგია არა მარტო ქართულ, აფხაზურ ენასაც უქმნის საფრთხეს. მინდა, მოვუწოდო აფხაზებს, დროულად მოეგონ გონს და ოკუპანტების იდეოლოგიური წნეხის ქვეშ ნუ მოქცევიან. ჩვენ მათ ვთავაზობთ სამშვიდობო განათლების პროგრამის დანერგვას, რომელიც ქართველი და აფხაზი ახალგაზრდების დაახლოებას შეუწყობს ხელს“, - განაცხადა პრესკონფერენციაზე დალი ხომერიკმა.
მისივე ინფორმაციით, წელს ერთიან ეროვნულ გამოცდებზე გალის რაიონიდან 150-მდე აბიტურიენტი გავიდა. აქედან პირველადი ჩარიცხვებით 80-მდე აბიტურიენტი სტუდენტი გახდა.
წყარო: „ინტერპრესნიუსი“
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
