ქუთაისის სააპელაციო სასამართლომ არ დააკმაყოფილა ადვოკატების შუამდგომლობა „მოძრაობა ერთიანი საქართველოსთვის“ ლიდერის, ეკა ბესელიას ძმისა და შვილისთვის გამოტანილი განაჩენის გაუქმების თაობაზე.
მოძრაობის პრესსამსახურის ცნობით, ადვოკატებს სასარჩელო განცხადებაში საქმის 12 ახალი გარემოება ჰქონდათ მითითებული, რომელიც სააპელაციო სამართლოს უნდა განეხილა. „ამ გადაწყვეტილებით ქუთაისის სააპელაციო სასამართლოს თავმჯდომარემ მალხაზ გურულმა პოლიტიკური დავალება შეასრულა და დაარღვია როგორც შიდა კანონმდებლობა, ასევე ევროპის კონვენცია“, - აცხადებენ პარტიაში.
ადვოკატები ამ გადაწყვეტილებას ევროპის ადამიანის უფლებათა სასამართლოში გაასაჩივრებენ და რატი მილორავასა და სერგო ბესელიას საქმეს სტრასბურგში გააგზავნიან, როგორც „პოლიტიკური დევნის მაგალითს“. როგორც ცნობილია, ბესელიას ძმა და შვილი ბათუმის ერთ-ერთ კაფე „ელზაში“ მომხდარ ჩხუბისა და პოლიციისთვის დაუმორჩილებლობისთვის დააკავეს. ქობულეთის სასამართლომ ბესელიას შვილს გირაოს გადახდა, ხოლო ძმას ორთვიანი წინასწარი პატიმრობა შეუფარდა.
წყარო: საინფორმაციო სააგენტო „პირველი“