საქმეს „ლუკა რამაზაშვილი საქართველოს წინააღმდეგ“ სტრასბურგის სასამართლო არსებითად განიხილავს

ადამიანის უფლებათა ევროპულმა სასამართლომ წარმოებაში მიიღო საქმე „ლუკა რამაზაშვილი საქართველოს წინააღმდეგ“ და მას არსებითად განიხილავს.

თელავის რაიონული სასამართლოს მიერ, ყაჩაღობაში, სხვისი ნივთის დაზიანება-განადგურებაში, გამოძალვასა და სხვა დანაშაულებში მსჯავრდებული რამაზაშვილი სასჯელს უკვე მეოთხე წელია იხდის. მსჯავრდებული სტრასბურგის სასამართლოსგან უდანაშაულოდ ცნობას ითხოვს.

უნდა აღინიშნოს, რომ კონსერვატორული პარტიის ადამიანის უფლებათა დაცვის კომისიამ პარტია „მრეწველების“ კახეთის რეგიონალური ორგანიზაციის ყოფილ ხელმძღვანელს ლუკა რამაზაშვილს ცოტა ხნის წინ პოლიტიკური პატიმრის სტატუსი მიანიჭა. რამაზაშვილის ბიზნესპარტნიორი, კომპანია „ყაზბეგის“ გენერალური დირექტორი გოგი თოფაძე ირწმუნება, რომ ადგილობრივმა ხელისუფლებამ, ლუკა რამაზაშვილი, ციხეში, თელავის დამოუკიდებელი რეგიონალური ტელეკომპანიის ხელში ჩაგდების მიზნით ჩასვა.

კახეთის საინფორმაციო ცენტრი