სიღნაღის რაიონული საავადმყოფოს დირექტორის გოგი ნიკვაშვილის წინააღმდეგ სისხლის სამარათლის საქმე აღიძრა. წნორის საოჯახო მედიცინის ცენტრის ექიმები ნიკვაშვილს ევროკავშირის პროგრამის ფარგლებში ცენტრისთვის გამოყოფილი სამედიცინო აპარატურისა და მასალების მითვისებაში ადანაშაულებენ.
გამოძიების დაწყების მოთხოვნით კახეთის საოლქო პროკურატურას „ადამიანის უფლებათა ცენტრმა“ მიმართა. ორგანიზაციის მიერ გავრცელებულ განცხადებაში ნათქვამია, რომ „ევროკავშირის მიერ გამოყოფილი დაფინანსებით, 2007 წელს, სიღნაღის რაიონის ქალაქ წნორში საოჯახო მედიცინის ცენტრის შენობა გარემონტდა და ცენტრი ახალი სამედიცინო აპარატურითა და მასალებით აღიჭურვა. წნორის საოჯახო მედიცინის ცენტრი, რომლის მომსახურებაც ქალაქ წნორში მცხოვრებ 6 ათასზე მეტ ადამიანზე იყო გათვლილი, ორი წლის განმავლობაში არ ფუნქციონირებდა. მთავარი ექიმი გოგი ნიკვაშვილი ექიმებს ცენტრში შესვლის და მუშაობის უფლებას არ აძლევდა, რაც დადასტურებულია ექიმების წერილობითი ახსნა-განმარტებებით. ექიმების თქმით, ნიკვაშვილმა მათ არაერთხელ უთხრა, რომ შეობაში შესვლა თუ უნდოდათ, კარი გაეტეხათ და ისე შესულიყვნენ. ექიმები საოჯახო მედიცინის ცენტრის შენობაში, რამდენიმე დღის წინ, სპეციალური კომისიის თანდასწრებით შევიდნენ. აღმოჩნდა, რომ ძვირადღირებული სამედიცინო აპარატურა და სხვა სამედიცინო მასალები გატანილია“.
შპს „ჯანმრთელობას“ დირექტორი გოგი ნიკვაშვილი წნორის საოჯახო მედიცინის ცენტრის გაქურდვას უარყოფს. თუმცა, უნდა აღინიშნოს, რომ მას შემდეგ რაც აღნიშნული საქმით „ადამიანის უფლებათა ცენტრი“ დაინტერესდა, ნიკვაშვილმა კარდიოგრაფიის აპარატი და გლუკომეტრი, შპს „ჯანმრთელობას“ ლაბორანტის მეშვეობით, საოჯახო მედიცინის ცენტრს დაუბრუნა. სხვა ტექნიკა და მასალები კი ამ დრომდე არ ჩანს.
კახეთის საინფორმაციო ცენტრი
ამ თემაზე:
ადამიანის უფლებათა ცენტრი სიღნაღის საავადმყოფოს დირექტორის მიმართ სს საქმის აღძვრას ითხოვს
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
