საფრანგეთის საგარეო საქმეთა მინისტრი ბერნარ კუშნერი აფხაზეთსა და ცხინვალის რეგიონში ევროკავშირის დამკვირვებლების დაშვებას მოითხოვს. ამის შესახებ მან რადიო “ეხო მოსკვის” ეთერში განაცხადა.
კუშნერის განცხადებით, რუსეთმა არ შეასრულა მედვედევ-სარკოზის გეგმა, რამდენადაც საერთაშორისო დამკვირვებლები აფხაზეთსა და ე.წ. სამხრეთ ოსეთში ვერ შედიან.
“რუსეთს შეთანხმება არ შეუსრულებია. კერძოდ, საუბარია ევროკავშირის დამკვირვებლების დაშვებაზე. აუცილებელია, დამკვირვებლებმა ორივე მხარეს იმუშავონ, კერძოდ სამხრეთ ოსეთშიც”, - განაცხადა კუშნერმა.
ევროკავშირის სადამკვირვებლო მისიამ (EUMM) საქართველოში პატრულირება 2008 წლის 1 ოქტომბერს დაიწყო. მისიის დამკვირვებლებს მედვედევი-სარკოზის შეთანხმების მიუხედავად აფხაზეთსა და ე.წ. სამხრეთ ოსეთში მოსკოვის, ასევე ცხინვალისა და სოხუმის მარიონეტული რეჟიმების წარმომადგენლები დღემდე არ უშვებენ.
წყარო: „ინტერპრესნიუსი“