ირაკლი სესიაშვილი: „პანკისში ვაჰაბისტებს ადგილობრივ ხელისუფლებაზე მეტი ძალა აქვთ“

უსაფრთხოების საკითხებში ექსპერტის ირაკლი სესიაშვილის თქმით, პანკისის ხეობაში ადგილობრივი ხელისუფლება სიტუაციას კარგად ვერ მართავს, ვაჰაბისტურ დაჯგუფებებს უფრო დიდი ძალა და ზეგავლენა აქვთ.

„ამ ბოლო დროს ხეობაში ვაჰაბიტური დაჯგუფების გააქტიურება შეინიშნება, რომელთა პოზიციები საკმაოდ მყარია. ისინი იქ საკუთარ ბიზნესს ავითარებენ და გარკვეული ზეგავლენა აქვთ ადგილობრივ ხელისუფლებასა და მოსახლეობაზე. ეს ბერკეტები და პრივილეგიები პანკისის ხეობაში მცხოვრები ახალგაზრდებისთვის შეიძლება მიმზიდველი აღმოჩნდეს. შესაძლებელია, რომ ისინი ამ ორგანიზაციაში გაწევრიანდნენ და შემდგომ სხვა მოქმედებებში აღმოჩნდნენ ჩართულნი. ამიტომაც საჭიროა ახლავე ყურადღების მიქცევა, რადგან არავინ იცის მერე როგორ განვითარდება ამ დაჯგუფების საქმიანობა. ზოგადად ხეობაში გარკვეული იარაღიც არსებობს, მაგრამ რამდენად ატარებს ეს მასობრივ და ორგანიზებულ ხასიათს, ესეც საკითხავია. ყველაფერი უნდა გავაკეთოთ პანკისის გამჭვირვალობისათვის“, - აღნიშნავს ირაკლი სესიაშვილი.

„კახეთის საინფორმაციო ცენტრი“