სიღნაღის ბიბლიოთეკის კუთვნილი 40 000-მდე წიგნი სკოლის სარდაფში ლპება. როგორც მუნიციპალიტეტის გამგეობის სახელოვნებო და საგანმანათლებლო ცენტრში განაცხადეს, ქალაქში ბიბლიოთეკის განსათავსებლად საჭირო ფართი არ არის.
ამავე ცენტრის ინფორმაციით, უსახსრობის გამო, ადგილობრივი ბიუჯეტიდან ვერც წიგნების დასაბინავებლად საკმარისი თანხები გამოიყო.
სიღნაღში ბიბლიოთეკა 2007 წლის მარტიდან აღარ ფუნქციონირებს. ქალაქის რეაბილიტაციის დროს ბიბლიოთეკის შენობა ეკონომიკური განვითარების სამინისტრომ კომპანია `კოკა-კოლაზე~ გაასხვისა და იქ სასტუმრო განთავსდა. სიღნაღის რაიონის ცენტრალური ბიბლიოთეკის კუთვნილი 70 000-მდე წიგნი 1200-მდე ტომარაში მოათავსეს და პირველი საჯარო სკოლის სარდაფში ჩაყარეს.
2009 წლის გაზაფხულზე, ბიბლიოთეკის ყოფილი თანამშრომლების აქტიურობით, გამგეობის წარმომადგენლებმა 30 000 წიგნი სარდაფიდან გაიტანეს, დანარჩენი 40 000 კი ისევ ნესტიან სარდაფში ყრია და ლპება.
აღსანიშნავია, რომ სიღნაღის მუნიციპალური ბიუჯეტიდან, მთელი წლის ბიუჯეტის თითქმის მესამედი ადგილობრივი ხელისუფლების შენახვაზე იხარჯება.
კახეთის საინფორმაციო ცენტრი