საქართველოს ახალ კონსტიტუციაზე მუშაობა შემოდგომისთვის დასრულდება.
ამის შესახებ სახელმწიფო საკონსტიტუციო კომისიის თავმჯდომარემ ავთანდილ დემეტრაშვილმა განაცხადა. მისი თქმით, ამ დროისთვის უკვე მზად იქნება კონსტიტუციის პროექტი, რომელიც პარლამენტმა, შესაძლოა, წლის ბოლოსთვის მიიღოს.
მისივე თქმით, ვენეციის კომისიის რეკომენდაციით, საჭიროა დროებითი, ე.წ. გარდამავალი პერიოდის დასრულება და კონსტიტუციის ევროპული ვარიანტის მიღება. „კონსტიტუციის პროექტში ძალიან ბევრი ცვლილება შევა, ვენეციის კომისიის მთავარი გზავნილია ეფექტიანი და შედეგიანი კონსტიტუციის მიღება“, - განაცხადა დავთანდილ დემეტრაშვილმა.
სახელმწიფო საკონსტიტუციო კომისიას ახალ კონსტიტუციაზე მუშაობა, თავდაპირველად, გასული წლის დეკემბერში უნდა დაესრულებინა. მოგვიანებით, თარიღმა მიმდინარე წლის გაზაფხულზე გადმოიწია, ამჯერად კი, როგორც ირკვევა, პროექტის საბოლოო ვარიანტის მიღება შემოდგომისთვის იგეგმება.
ქვეყნის ახალი კონსტიტუცია ძალაში მას შემდეგ შევა, როცა უკვე დასრულებულ ვარიანტს ვენეციის კომისია განიხილავს და თავის დასკვნას მოამზადებს. ვენეციის კომისია საქართველოს კონსტიტუციაზე 1993 წლიდან მუშაობს.
4 თებერვალს ვენეციის კომისიის დელეგაციასთან შეხვედრისას არასამთავრობო სექტორისა და ექსპერტების ძირითადი ნაწილი შეთანხმდა, რომ დებატები, რომელიც საკონსტიტუციო კომისიაში ახალ კონსტიტუციაზე მუშაობისას მიმდინარეობს, საჯარო უნდა გახდეს.
ამის შესახებ ჟურნალისტებს პოლიტოლოგმა ანდრო ბარნოვმა განუცხადა. მისი თქმით, საჭიროა, ხალხმა გაიგოს, რა საკითხებზე მიმდინარეობს მსჯელობა და თავადაც ჩაერთოს ამ პროცესში.
„თუ გვინდა, ხვალ გვქონდეს დემოკრატიული ქვეყანა, უნდა დაიძლიოს საზოგადოების არასათანადო მზადყოფნის პრობლემა. დებატები უნდა გამოვიდეს კომისიის გარეთ და ამაში ყველამ უნდა მიიღოს მონაწილეობა“, - განაცხადა ანდრო ბარნოვმა.
„ინტერპრესნიუსი“
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
