აშშ-ის ელჩმა საქართველოში, ჯონ ბასმა, 14 მარტს განაცხადა, რომ ტელეკომპანია „იმედის“ დადგმული სიუჟეტი იყო „უპასუხისმგებლობა“, რომელიც საქართველოს უსაფრთხოების რეალური პრობლემების მოგვარებას ხელს არ უწყობს.
საზოგადოებრივი მაუწყებლის გადაცემა „აქცენტებში“ საუბრისას, აშშ-ის ელჩმა განაცხადა, რომ ეს დადგმული ამბავი „უაღრესად შემაშფოთებელი“ იყო იმ ხალხისთვის, „რომლებიც ვერ გაერკვნენ, ეს სიმართლე იყო, თუ მოგონილი“.
„ჩემი აზრით, ეს იყო საკმაოდ უპასუხისმგებლო“, - განაცხადა მან, - „ეს არ არის ის, რასაც ჩვენ პროფესიონალური ჟურნალისტიკის სტანდარტებად მივიჩნევთ“. „მე არ მგონია, რომ ამ სახის გადაცემები - თუნდაც მას მითითებული ჰქონოდა, რომ ის გამოგონილია - ამ კონკრეტულ მომენტში იყოს ხელისშემწყობი საქართველოს წინაშე მდგომი უსაფრთხოების რეალურ საფრთხეებთან და პრობლემებთან გასამკლავებლად“.
საზოგადოებრივი მაუწყებლის გადაცემაში აშშ-ის ელჩი მიწვეული იყო ადამიანის უფლებების შესახებ სახელმწიფო დეპარტამენტის ყოველწლიურ ანგარიშზე სასაუბროდ.
ჯონ ბასმა განაცხადა, რომ ერთ-ერთი უმთავრესი საკითხი, რაც მოხსენებამ საქართველოსთან მიმართებაში გამოავლინა არის ის, რომ არ ხდება კანონის გამოყენება ყველასთვის „თანაბრად და თანმიმდევრულად“.
„მე ვფიქრობ, ეს არის ყველაზე მნიშვნელოვანი სფერო, სადაც საქართველოს პროგრესი ესაჭიროება“, - განაცხადა ელჩმა.
„საქართველოს უდიდეს გამოწვევად ახლა რჩება გარდამავალი პროცესის დასრულება, რათა ის მომწიფებულ დემოკრატიად ჩამოყალიბდეს, სადაც არა მარტო სამართლებრივი ჩარჩო და დემოკრატიული ინსტიტუტებია, არამედ დემოკრატიის კულტურაც“, - განაცხადა ბასმა.
სივილ ჯორჯია