მოსკოვი 29 მარტის ტერაქტებში ქართულ კვალს არ გამორიცხავს. ამის შესახებ რუსეთის უშიშროების საბჭოს მდივანმა, ნიკოლაი პატრუშევმა განაცხადა.
„ჩვენ ვფლობდით ინფორმაციას, რომ საქართველოს სპეცსამსახურების ზოგიერთ წარმომადგენელს კონტაქტები ჰქონდა ჩრდილოეთ კავკასიაში მოქმედ ტერორისტულ ორგანიზაციებთან. მოსკოვში განხორციელებულ ტერაქტებთან დაკავშირებით ჩვენ ეს ვერსიაც უნდა გადავამოწმოთ“, - აღნიშნა პატრუშევმა.
მისივე განმარტებით, „ტერაქტებში ქართული კვალის შემოწმება აუცილებელია, რაკიღა საქართველოს პრეზიდენტი, მიხეილ სააკაშვილი არაპროგნოზირებადია და ერთხელ უკვე გააჩაღა ომი. გამორიცხული არ არის, კიდევ გაიმეოროს“.
აღსანიშნავია, რომ დღემდე მოსკოვში საგამოძიებო ორგანოების მიერ გაკეთებულ განცხადებებში ქართული ვერსია ნახსენები არ ყოფილა. ნათქვამი იყო, რომ განიხილებოდა ე.წ. კავკასიური კვალი.
მოსკოვის მეტროპოლიტენის სადგურებში „ლუბიანკასა“ და „კულტურის პარკში“ აფეთქება 29 მარტს, ადგილობრივი დროით, 07:52 და 08:32 საათებში მოხდა. რუსეთის საგანგებო სიტუაციების სამინისტრომ 39 დაღუპულის შესახებ ინფორმაცია დაადასტურა. დაშავებულთა რაოდენობამ კი 65 შეადგინა.
მომხდარს ტერაქტის კვალიფიკაცია მიეცა. წინასწარი ინფორმაციით, აფეთქებები თვითმკვლელმა ტერორისტმა ქალებმა განახორციელეს, რომლებიც რუსეთის უშიშროების ფედერალური სამსახურის ინფორმაციით, ჩრდილოეთ კავკასიიდან იყვნენ. ტელეკომპანია CNN-ის ინფორმაციით, მოსკოვის აფეთქებებზე პასუხისმგებლობა ჩეჩენმა ტერორისტებმა აიღეს.
„ინტერპრესნიუსი“
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
