1200 რესპოდენტიდან მხოლოდ 37 ადამიანმა განაცხადა, რომ სოფლის დახმარების პროგრამაში ჩართულია

სოფლის  დახმარების პროგრამაში მოქალაქეთა ჩართულობის დონის დასადგენად კახეთის საინფორმაციო ცენტრმა სოციოლოგიური გამოკითხვა ჩაატარა. გამოკითხვამ კახეთის 6 მუნიციპალიტეტის, თელავის, ახმეტის, ყვარლის, ლაგოდეხის, გურჯაანის და დედოფლისწყაროს 24 სოფელი მოიცვა.

გამოკითხვა კარდაკარის პრინციპით, 30,31 მარტს, 1,2,7,8 აპრილს ჩატარდა და 1200 რესპონდენტი გამოიკითხა. დასმული იყო ერთი შეკითხვა: მიიღეთ თუ არა მონაწილეობა იმ პრობლემების გამოკვეთაში, რომლის მოგვარებაც სოფლის დახმარების პროგრამით გსურთ?

გამოკითხულთაგან 37-მა რესპონდენტმა განაცხადა, რომ სოფლის დახმარების პროგრამის ფარგლებში მოსაგვარებელი პრობლემების გამოკვეთაში მონაწილეობა მიიღო. დადებითი პასუხი მიღებულ იქნა მხოლოდ 3 მუნიციპალიტეტის 8 სოფელში; 1094-მა რესპონდენტმა განაცხადა, რომ მონაწილეობა არ მიუღია. ყველაზე დაბალი შედეგი ახმეტისა და გურჯაანის მუნიციპალიტეტებში გამოვლინდა; 69 რესპონდენტმა კითხვაზე პასუხის გაცემისგან თავი შეიკავა. 

გამოკითხვა კახეთის საინფორმაციო ცენტრის კორესპონდენტებმა და სტაჟიორებმა კახეთის საინფორმაციო ცენტრის განვითარების პროექტის ფარგლებში ჩაატარეს. პროექტი ფონდ „ღია საზოგადოება - საქართველოს“ ფინანსური მხარდაჭერით ხორციელდება.

კახეთის რვა რაიონს სოფლის დახმარების პროგრამით 5 014 996 ლარი გამოეყო. გურჯაანის მუნიციპალიტეტის 31 სოფელს 830 257 ლარი ერგო; ყვარლის რაიონის 22 სოფელს 437 185 ლარი; ლაგოდეხის რაიონის 39 სოფელს 886 593 ლარი; საგარეჯოს რაიონის 43 სოფელს 744 653 ლარი; სიღნაღის რაიონის 23 სოფელს 521 640 ლარი; თელავის რაიონის 28 სოფელს 668 884 ლარი; ახმეტის რაიონის 38 სოფელს 568 508 ლარი; დედოფლისწყაროს რაიონის 16 სოფელს 357 277 ლარი.

კახეთის საინფორმაციო ცენტრი