სადამკვირვებლო ორგანიზაცია „საერთაშორისო გამჭვირვალობა - საქართველო“ ცესკოსგან „ნაციონალური მოძრაობის“ წინასაარჩევნო კამპანიაში გურჯაანის რაიონული პროკურორის გელა ლაზაშვილის მონაწილეობის ფაქტზე შესაბამის რეაგირებას ითხოვს.
როგორც „საერთაშორისო გამჭვირვალობა - საქართველოს“ საჩივარშია ნათქვამი, 29 აპრილს, სამუშაო საათებში, გურჯაანის კულტურის ცენტრში, გურჯაანის რაიონული პროკურორი ესწრებოდა „ერთიანი ნაციონალური მოძრაობის“ პარტიული სიის და მაჟორიტარი დეპუტატობის კანდიდატების წარდგენას, რაც საარჩევნო კოდექსის 73-ე მუხლის მე-5 პუნქტის „დ“ ქვეპუნქტის დარღვევაა. აღნიშნული მუხლის თანახმად, საქართველოს პროკურატურის საჯარო მოხელეებს ეკრძალებათ წინასაარჩევნო კამპანიაში მონაწილეობის მიღება.
ცესკო-ს თავმჯდომარის ზურაბ ხარატიშვილის განცხადებით, სადამკვირვებლო ორგანიზაციის საჩივრის საფუძველზე ცესკო-ში დაწყებულია ადმინისტრაციული წარმოება.
კახეთის საინფორმაციო ცენტრი