ურეკს ამდენი დამსვენებელი და პრობლემები არ ახსოვს

დაბა ურეკში დამსვენებელთა რაოდენობა დღითიდღე მატულობს.
როგორც ამბობენ, ამის მიზეზი ქალაქ ქობულეთის მოუწესრიგებელი კანალიზაცია და გადათხრილი ქუჩებია, რის გამოც იქიდან ურეკს უკმაყოფილო დამსვენებელთა დიდმა ნაკადმა მიაშურა. დამსვენებლების რაოდენობის ზრდასთან ერთად, დაბაში გარევაჭრობის მასშტაბებიც გაიზარდა და  ქაოსური სახე მიიღო.

ოზურგეთის მუნიციპალიტეტის ზედამხედველობის სამსახურის უფროსის, ზაზა გოგუაძის თქმით, წლებია, ურეკს ამდენი დამსვენებელი არ ახსოვს. გარევაჭრობის პრობლემებისა და სხვა საკითხების მოგვარების მიზნით, დროებითი სამუშაო ჯგუფი შეიქმნა, რომელიც სპეციალურ ღონისძიებებს გაატარებს. 

„ურეკში ყველა კუთხე მოუწესრიგებელია. გაფრთხილება ყველას მივეცით. თუმცა, ჯერჯერობით, ჩემი ინფორმაციით, არავინ დაუჯარიმებიათ. მუნიციპალიტეტი ტერიტორიას გამოყოფს და მოვაჭრეებს სპეციალურ ადგილს მივუთითებთ. თუ ვინმე ჩვენს მითითებას დაარღვევს, სამართალდამცავებს ვაცნობებთ, რის შემდეგაც მათ უნდა გაატარონ დამსჯელი ღონისძიება“, - გვითხრა გოგუაძემ.