კახეთის საჯარო სკოლებიდან გათავისუფლებულმა მასწავლებლებმა რეგიონის გუბერნატორის ადმინისტრაციასთან საპროტესტო აქციის გასამართად საჭირო ნებართვის მისაღებად, თელავის მუნიციპალიტეტის გამგეობას მიმართეს. საპროტესტო აქციაში მონაწილეობას 200-მდე პედაგოგი აპირებს.
როგორც კახეთის საინფორმაციო ცენტრს თელავის მუნიციპალიტეტის გამგებელმა ვასილ დავითაშვილმა განუცხადა, გამგეობაში პედაგოგების მოთხოვნა ჯერჯერობით არ შესულა.
„როცა მოთხოვნას გავეცნობით, მივიღებთ გადაწყვეტილებას, რა რეაგირება მოვახდინოთ. რა აქვს ამ ხალხს გასაპროტესტებელი?! სახელმწიფო ამდენ რამეს აკეთებს მათთვის“, - იკითხა დავითაშვილმა.
შეგახსენებთ, რომ ბოლო ერთი კვირის განმავლობაში ჩუმლაყის საჯარო სკოლიდან 16 მასწავლებელი გაათავისუფლეს, გურჯაანის მე-3 საჯარო სკოლიდან - 12, ახაშნის საჯარო სკოლიდან 13, ანაგის საჯარო სკოლიდან 16, ბოდბის საჯარო სკოლიდან 19, კარდენახის საჯარო სკოლიდან 20 და ა.შ.
კახეთის საინფორმაციო ცენტრი