გურჯაანის რაიონის სოფელ ჭანდრის საჯარო სკოლის დირექტორმა მანანა მჭედლიშვილმა პედაგოგებს, რომლებსაც სასწავლო საათები დააკლო, უფლებების დაცვის მიზნით არასამთავრობო ორგანიზაცია „ადამიანის უფლებათა ცენტრის“ კახეთის ოფისში მისვლა აუკრძალა.
„თათბირზე გამოგვიცხადა - ზოგიერთებს საჩივრები შეგიტანიათ „ადამიანის უფლებათა ცენტრში“ და კიდევ თუ მიხვალთ იქ, სკოლიდან საერთოდ გაგაგდებთო. მე ისეთი მფარველი მყავს, მაინც ვერაფერს დამაკლებთ და უარესად არ დაზარალდეთო, დაგვემუქრა“, - აღნიშნეს მასწავლებლებმა.
სკოლის დირექტორი მანანა მჭედლიშვილი, რომელიც ტელეკომპანია „გურჯაანის“ ყოფილი ჟურნალისტია, მასწავლებლების ბრალდებებს უარყოფს.
„რა სისულელეა, საერთოდ არ მითქვამს არავისთვის მაგდაგვარი არაფერი“, - განაცხადა მანანა მჭედლიშვილმა.
კახეთის საინფორმაციო ცენტრი