ევროპარლამენტი საქართველოს სასამართლო სისტემის, კანონის უზენაესობის, მედიის პლურალიზმის და ოპოზიციასთან თანამშრომლობის მხრივ ახალი რეფორმების გატარებისკენ მოუწოდებს. ამის შესახებ საქართველოს პარლამენტის სპიკერთან გამართული შეხვედრის შემდეგ, ევროპარლამენტის თავმჯდომარემ, იერჟი ბუზეკმა განაცხადა.
მისი თქმით, მას სურს მიულოცოს საქართველოს ის რეფორმები, რომელიც უკვე გატარდა, მაგრამ ახლა სურს მოუწოდოს ახალი რეფორმებისაკენ.
„მოდით, მივცეთ დამატებითი იმპულსი ახალი რეფორმების გატარებას. ეს აუცილებელია იმისათვის, რომ საქართველოსა და ევროკავშირს შორის არსებობდეს სწორი ურთიერთთავსებადობა“, - განაცხადა იერჟი ბუზეკმა და საქართველოს მოუწოდა რეფორმებისა და ცვლილებებისაკენ ისეთ სფეროებში, როგორებიცაა სასამართლო სისტემა, კანონის უზენაესობა, მედიაპლურალიზმი და თანამაშრომლობა ოპოზიციასთან.
მისი თქმით, ყოველივე ეს აუცილებელია იმისთვის, რომ ქვეყანა წინ წავიდეს. „ამის გარეშე შეუძლებელი იქნება ეკონომიკური ზრდის მიღწევა“, - განაცხადა ევროპარლამენტის თავმჯდომარემ და იქვე ხაზი გაუსვა, რომ ევროპარლამენტს არ სურს საქართველოს რაიმე მოახვიოს თავს, არამედ სურს, ეს ინიციატივები თავად საქართველოს მოქალაქეებიდან და ხელისუფლებიდან მომდინარეობდეს.
„იმისათვის, რომ სათანადოდ ვითანამშრომლოთ, აუცილებელია უფრო მეტი თავსებადობა ჩვენს სისტემებს შორის“, - დასძინა იერჟი ბუზეკმა.
ინტერპრესნიუსი