კატეგორიები
ჟურნალისტური მოკვლევა
სტატია
რეპორტაჟი
ანალიზი
ფოტო რეპორტაჟი
ექსკლუზივი
ინტერვიუ
უცხოური მედია საქართველოს შესახებ
რედაქტორის აზრი
პოზიცია
მკითხველის აზრი
ბლოგი
თემები
ბავშვები
ქალები
მართლმსაჯულება
ლტოლვილები / დევნილები
უმცირესობები
მედია
ჯარი
ჯანდაცვა
კორუფცია
არჩევნები
განათლება
პატიმრები
რელიგია
სხვა

ინტერპოლის ძებნილი პოლიტიკურ დევნილად იქცა

22 ივნისი, 2011

ზაზა წულაძე, ამერიკის ხმა, თბილისი

54 წლის თემურ ბასილიას, რომელსაც საქართველოს შინაგან საქმეთა სამინისტრო ინტერპოლის ხაზით, წითელი ცირკულარით ეძებს ამერიკის შეერთებულმა შტატებმა პოლიტიკური თავშესაფარი მისცა.

ეკონომისტი ბასილია ქართულ პოლიტიკაში რესპუბლიკურ-ფედერალური პარტიის რიგებში გამოჩნდა, შემდეგ კი ტრადიციონალისტთა კავშირის წევრი გახდა. სწორედ ამ პარტიის სიით შევიდა ბასილია 1992 წელს პარლამენტში, სადაც ჯერ საბიუჯეტო საკითხების კომიტეტის თავჯდომარე იყო, 1994 წელს კი მთავრობაში ვიცე-პრემიერის თანამდებობა დაიკავა.  ერთი წლის შემდეგ, როცა ტრადიციონალისტები პარლამენტში ვეღარ მოხვდნენ, ბასილიამ პარტია დატოვა და სახელმწიფო სამსახურში დარჩა. უკვე 1997 წელს იგი პრეზიდენტ შევარდნაძის ეკონომიკურ მრჩევლად დაინიშნა და ამ თანამდებობაზე „ვარდების რევოლუციამდე“ იმუშავა. ბასილია 2004 წელს რამდენჯერმე დაკითხეს, თუმცა არ დაუკავებიათ და ქვეყნის დატოვების საშუალება მისცეს. მოგვიანებით მასზე ძებნა გამოცხადდა, 2008  წელს საქალაქო სასამართლომ  დაუწრებლად, ბასილიას ცხრა წლით თავისუფლების აღკვეთა მიუსაჯა.  „ამერიკის ხმისთვის“ მიცემულ ექსკლუზიურ ინტერვიუში თემურ ბასილია ჰყვება თუ როგორ და რატომ მიიღო ამერიკაში პოლიტიკური თავშესაფარი.

„მიმდინარე წლის 26 მაისს, საემიგრაციო სასამართლომ ბალტიმორში ჩემი საკითხი განიხილა. მოსამართლემ მიიღო გადაწყვეტილება ჩემთვის აშშ-ში პოლიტიკური თავშესაფრის მონიჭების თაობაზე. ჩემი არგუმენტები ემყარებოდა იმ ფაქტებს, რომ ჩემს მიმართ გრძელდებოდა პოლიტიკური მოტივით დევნა, რაც გაიზიარა ამერიკის საემიგრაციო სასამართლომ და შესაბამისი გადაწყვეტილებაც მიიღო“.

საინტერესოა, რომ ძებნილი ბასილია ჩვეულებრივად განაგრძობდა მუშაობას. 2004-2005 წლებში ის ტაჯიკეთში, გაეროს მილენიუმის პროგრამის ხელმძღვანელი იყო.  მოგვიანებით, ისევ გაეროს თანამშრომლის რანგში ყაზახეთში ცხოვრობდა. 2009 წელს, ბასილია მოულოდნელად ვაშინგტონში „პროგრესის ცენტრში“ გამოჩნდა, რასაც თბილისში დიდი ხმაური მოჰყვა. შარშან, თებერვალში კი საქართველოს პროკურატურამ გაავრცელა ინფორმაცია, რომ ბასილია ვაშინგტონში საემიგრაციო კანონმდებლობის დარღვევისთვის დააკავეს. პროკურორმა ნანა რაფავამ  მაშინ განაცხადა, რომ ამერიკა ბასილიას საქართველოსთვის გადაცემას გეგმავდა. დღეს თემურ ბასილია აცხადებს, რომ ეს შეგნებული დეზინფორმაცია იყო და იგი არავის დაუკავებია.

ნანა რაფავა: „თემურ ბასილია ამჟამად დაკავებულია ამერიკის შეერთებულ შტატებში, საემიგრაციო კანონმდებლობის დარღვევასთან დაკავშირებით და ამერიკის შეერთებული შტატების საემიგრაციო სამსახური გეგმავს მის დეპორტაციას საქართველოში უახლოეს მომავალში“.

თემურ ბასილია: „2010 წლის 4 თებერვალს როცა გავცელდა ინფორმაცია, რომ თითქოს მე აშშ-ი ამერიკის ხელისფლების წარმომადგენლებმა დამაკავეს საემიგრაციო წესების დარღვევის დროს, მე სინამდვილეში ამ დროს ვიმყოფებოდი საკუთარ სახლში და სრულიად ჩვეულებრივად ვცხოვრობდი“.

ძებნილი ბასილიასთვის ამერიკის მიერ პოლიტიკური თავშესაფრის მინიჭების თაობაზე კომენტარის გაკეთება საქართველოს არც აღმსარულებელი და არც საკანონმდებლო ხელისუფლების წარმომადგენლებმა ისურვეს. თავად ბასილია ამბობს, რომ პროფესიით აპირებს მუშაობის გაგრძელებას: „ახლა უკვე მე შევძლებ, ჩავერთო ჩემი პროფესიული საქმიანობის თვალსაზრისით. მე მაინც პირველ რიგში ვფიქრობ, რომ ჩემი პროფესიული კარიერა გავაგრძელო, როგორც ეკონომისტის და ამის შემდეგ შემეძლება დანარჩენ სხვაზე საუბარი“.

2004 წლის შემდეგ, თემურ ბასილიას მსგავსად, უცხოეთის ქვეყნებში პოლიტიკური თავშესაფარი საქართველოში გასამართლებულმა ან ძებნილმა რამდენიმე ცნობილმა პიროვნებამ მიიღო. საფრანგეთმა პოლიტიკური თავშესაფარი მისცა თავდაცვის ყოფილ მინისტრს ირაკლი ოქრუაშვილს და შიდა ქართლის ყოფილ გუბერნატორს მიხეილ ქარელს, რომელთაც საქართველოში შესაბამისად 11 და 16 წლით პატიმრობა აქვთ მისჯილი. ჰოლანდიამ თავშესაფარი მისცა თავდაცვის სამინისტროს ყოფილ მაღალჩინოსანს იასონ ჩიხლაძეს, რომელიც იძებნებოდა და გერმანიაში დაკავებულიც იყო. გერმანიამ თავის მხრივ თავშესაფარი მისცა ტელეკომპანია „რუსთავი2“-ის მეპატრონე ქიბარ ხალვაშს და თბილისს არ გადმოსცა სატყეო დეპარტამენტის ყოფილი უფროსი ბიძინა გიორგობიანი, რომელიც დღემდე წითელი ცირკულარით იძებნება. შვეიცარიაში თავშესაფარი მიიღო „მადნეულის“ ყოფილმა დირექტორმა ზურაბ ლობჟანიძემ, რომელსაც შვიდი წელი აქვს მისჯილი და ასევე ინტერპოლის ხაზით იძებნება. ბოლო წლებში, შვეიცარიამ პოლიტიკური თავშესაფარი ასევე მისცა „ნაციონალური მოძრაობის“ სწრაფი რეაგირების სამსახურის ყოფილ უფროსს სოსო ჯანდიერს, თბილისში მოკლული გურამ შარაძის ქალიშვილს, რუსუდან შარაძეს და ჟურნალისტ ვახტანგ კომახიძეს.

აშშ-მა 2008 წელს პოლიტიკური თავშესაფარი ასევე მისცა საქართველოს საზღვაო ძალების ყოფილ სარდალს გოჩა ვეტრიაკოვს.

ორიგინალი

ახალი ამბები