ენერგოომბუდსმენი და „სემეკი“ არცერთ დარღვევაზე რეაგირებას არ ახდენენ

ადამიანის უფლებათა ცენტრი ენერგეტიკისა და წყალმომარაგების მარეგულირებელ ეროვნულ კომისიას და მომხმარებელთა ინტერესების საზოგადოებრივ დამცველს ვალერი ფხაკაძეს „კახეთის ენერგოდისტრიბუციის“ მიერ აბონენტთა უფლებების დარღვევის ფაქტებზე გულგრილობაში ადანაშაულებს.

ადამიანის უფლებათა ცენტრის ინფორმაციით, „კახეთის ენერგოდისტრიბუცია“ უხეშად და მასობრივად არღვევს მომხმარებელთა უფლებებს, სემეკი და ენერგოომბუდსმენი კი არცერთ დარღვევაზე, რომელიც საინფორმაციო საშუალებებით ხშირად ვრცელდება, რეაგირებას არ ახდენენ.

„უფრო მეტიც, არც კი ინტერესდებიან. ისინი მომხმარებლების ინტერესებს კი არა, ენერგოსადისტრიბუციო კომპანიის ინტერესებს იცავენ. სემეკს მიღებული აქვს დადგენილება, ე.წ. დროებითი წესი, რომლის მოშველიებითაც „კახეთის ენერგოდისტრიბუცია“ აბონენტებს მოხმარებული ელექტროენერგიის გადასახადის გარდა, ასობით და ათასობით ლარის გადახდას აიძულებს, წინააღმდეგ შემთხვევაში კი აბონენტებს ელექტროენერგიას არ აძლევს“, - აღნიშნეს ადამიანის უფლებათა ცენტრში.

კახეთის საინფორმაციო ცენტრი