„გაწყვიტეთ თოკები“ - ახალგაზრდების საპროტესტო პერფორმანსი თავისუფლების მოედანზე

საქართველოსა და საფრანგეთის პრეზიდენტების და ათასობით მოქალაქის მიერ თავისუფლების მოედნის დატოვების შემდეგ, ახალგაზრდების ჯგუფმა წმინდა გიორგის მონუმენტის მიმდებარე ტერიტორიაზე საპროტესტო აქცია გამართა.

ჟურნალისტებთან საუბრისას ახალგაზრდებმა განაცხადეს, აქ ათასობით ადამიანი ძალით იყო მიყვანილი.

გიორგი აბდუშელიშვილის განცხადებით, ხალხს კისერზე თოკი შეაბეს და პრეზიდენტების მოსასმენად ისე მირეკეს. თუ ვინმეს სურვილი ჰქონდა საქართველოსა და საფრანგეთის პრეზიდენტები ეხილა, თავად უნდა მოსულიყო და არა ძალდატანებით.

ახალგაზრდებმა თეატრალიზებული სანახაობაც მოაწყვეს. სამ მათგანს ყელზე თოკები ჰქონდა შებმული, ხოლო ერთი გოგონა მათ თავისუფლების მოედანზე ძალით მიერეკებოდა.

აქციის მონაწილე ლევან ბზიაშვილმა ლექსები წაიკითხა, რის შემდეგაც ახალგაზრდებმა თავისუფლების მოედანი დატოვეს.