საგამოძიებო სამსახურმა გლეხებს, რომლებმაც ყურძნის ფული ვერ მიიღეს, გამოძიების დაწყებაზე უარი უთხრა

ფინანსთა სამინისტროს საგამოძიებო სამსახურის კახეთის სამმართველომ უარი თქვა გამოძიება დაეწყო შპს „ღრუბელის“ მიერ გურჯაანის რაიონის სოფლებში მცხოვრები გლეხებისთვის ყურძნის ფულის გადაუხდელობის და თაღლითურად მოტყუების ფაქტზე.

22-მა მევენახემ შპს „ღრუბელს“ ე. წ. უწამლი და კაბერნეს ჯიშის ყურძენი 2008 წელს, ზეგაანის და მუკუზნის ღვინის ქარხნებში ჩააბარა. მათ დავალიანების დაფარვა არაერთხელ მოითხოვეს, თუმცა - უშედეგოდ, რის შემდეგაც გლეხებმა საჩივრით ფინანსთა სამინისტროს საგამოძიებო სამსახურს მიმართეს.

„შპს „ღრუბელთან“ დადებული ხელშეკრულების მიხედვით, მხარეები სადაო საკითხის გადასაწყვეტად მიმართავენ სასამართლოს. განცხადებაში მოყვანილი ფაქტები არის სასამართლოში სამოქალაქო წესით დავის საგანი, რის გამოც მათ შეუძლიათ მიმართონ სასამართლოს“, - აღნიშნავს საგამოძიებო სამსახურის კახეთის სამმართველოს უფროსი ხუტა პაჭკორია.

მევენახეებმა სასამართლოს 3 თვის წინ მიმართეს, თუმცა, სასამართლოს საქმის განხილვა ჯერ არ დაუწყია.

კახეთის საინფორმაციო ცენტრი