რუსმა სამხედროებმა ცხინვალის რეგიონში საქართველოს ოთხი მოქალაქე დააკავეს. ამის შესახებ სააგენტო „რესი“ იუწყება.
საქართველოს მოქალაქეები ე.წ. სამხრეთ ოსეთის „საზღვრის უკანონოდ გადაკვეთის“ გამო დააკავეს.
„22 იანვარს, 13:25 საათზე რუსეთის სასაზღვრო სამმართველოს თანამშრომლებმა ცხინვალის რაიონის სოფელ დისევთან ახლოს, სახელმწიფო საზღვრის დარღვევის მცდელობისას სამხრეთ ოსეთიდან საქართველოში მიმავალი საქართველოს სამი მოქალაქე დააკავეს. იმავე დღეს, 15:00 საათზე ლენინგორის რაიონის სოფელ წინაგარასთან ახლოს საქართველოდან სამხრეთ ოსეთის მიმართულებით სახელმწიფო საზღვრის რეჟიმის დარღვევისთვის საქართველოს ერთი მოქალაქეა დაკავებული“, - განაცხადეს „მესაზღვრეების სამმართველოს“ პრესსამსახურში.
შემდგომი მოკვლევისთვის დაკავებულები ე.წ. სამხრეთ ოსეთის დე-ფაქტო სასაზღვრო სამსახურს გადასცეს.
ინტერპრესნიუსი