სასამართლომ პარტიების 17 შემომწირველი სამართალდამრღვევებად სცნო

თბილისის საქალაქო სასამართლომ პოლიტიკური პარტიების 17 შემომწირველი უკანონო შემოწირულობის განხორცილებაში დამნაშავედ სცნო და ბიუჯეტის სასარგებლოდ შემოწირულობის ხუთმაგი ოდენობის ჯარიმის გადახდა დააკისრა.

მოსამართლე გიორგი მიქაუტაძის გადაწყვეტილებით, „თავისუფალი საქართველოს“ წევრი გიორგი მოსიაშვილს 125 350 ლარის ოდენობის ჯარიმის გადახდა დაეკისრა, მის თანაპარტიელ ალექსანდრე შალამბერიძეს – 40 250 ლარის, ირაკლი ჭუბაბრიას – 79 145 ლარის, ბადრი ცინცქილაძეს – 40 100 ლარის, კონსერვატორ ბიძინა გუჯაბიძეს – 150 000 ლარის, მის თანაპარტიელ დავით ბაციკაძეს – 135 750 ლარის, ზაალ გოგსაძეს – 60 ათასი ლარის, გივი რამაზაშვილს – 80 ათასი ლარის, გიგა ბუკიას– 77 250 ლარის, კახა ჩაკვეტაძეს – 93 460 ლარის, ლევან ჩიჩუას – 24 987, ავთანდილ დავითაძეს – 114 192 ლარის, ბეჟან ოდიშვილს, რომელმაც “ნაციონალურ მოძრაობას” ხუთი ათასი ლარი შესწირა – 25 000 ლარის, მაია თანიაშვილს – 24 986 ლარის, ირმა დავითაძეს – 78 365 ლარის, მარინა ნადირაძეს 57 400 ლარის, ლეილა ჩქარეულს – 20 000 ლარის.

ზემოხსენებულ პირებს ჯარიმების გადახდისათვის 7-დღიანი ვადა აქვთ. მათი ადვოკატები განაჩენის ზემდგომ ინსტანციაში გასაჩივრებას უახლოეს ხანებში აპირებენ.

შეგახსენებთ, რომ დღევანდელი სასამართლო სხდომა რამდენიმე საათის განმავლობაში ხმაურის ფონზე მიმდინარეობდა. მოსამართლე გიორგი მიქაუტაძემ ერთ-ერთი ბრალდებული დავით ბაციკაძე, დარბაზიდან გააძევა, რის შემდეგაც ეს უკანსკნელი შეუძლოდ გახდა და სასამართლოში სასწრაფო დახმარების ბრიგადის გამოძახება გახდა საჭირო. მიქაუტაძემ, რომლის აცილებასაც ადვოკატები სხდომის დასაწყისში უშედეგოდ ითხოვდნენ, დაცვის მხარის ერთ-ერთი წარმომადგენელი, იურისტი ლილი გელაშვილი წესრიგის დარღვევის ბრალდებით 50 ლარით დააჯარიმა.

ადვოკატები მოსამართლის გადაწყვეტილებას უკანონოდ მიიჩნევენ და აცხადებენ, რომ სასამართლომ მათი არც ერთი არგუმენტი არ გაითვალისწინა, ხოლო შუამდგომლობა - არ დააკმაყოფილა.

მედიანიუსი