პორტალი ადამიანის უფლებების შესახებ

ქუთაისში 19 დეკემბერს პრეზიდენტის ვიზიტის დროს მომხდარი ინცინდენტთან დაკავშირებით სამართალდამცველებმა გამოძიება დაიწყეს. პოლიციამ უკვე დაკითხა აქციის რამდენიმე მონაწილე. 

აღნიშნულთან დაკავშირებით 20 დეკემბერს პრესკონფერენცია გამართა ქუთაისის მაჟორიტარმა დეპუტატმა გუბაზ სანიკიძემ, რომელიც მომხდარის „ქართული ოცნების“ მხრიდან პროვოცირებას კატეგორიულად უარყოფს.

„ნაციონალური  მოძრაობის“ წევრების განცხადებით კი, აქციის მონაწილეთა ხმაურიანი პროტესტი სწორედ „ქართული ოცნების“ მიერ იყო პროვოცირებული და მას გუბაზ სანიკიძის წინასაარჩევნო შტაბის ხელმძღვანელი ზაზა მეთაფლიშვილი ორგანიზატორობდა.

სანიკიძის განცხადებით: „მეთაფლიშვილი ქუთაისში კარგა ხანია, არ ყოფილა, ხოლო კახი დვალიშვილი, რომლის გვარი ასევე გაჟღერდა, შემთხვევის დროს გიორგი თევდორაძეს დაეხმარა მანქანამდე მისულიყო და ტერიტორია უსაფრთხოდ დაეტოვებინა“.

„ნაციონალებს“ არ უნდა მიეცეს საშუალება, მომხდარი თავის სასარგებლოდ გამოიყენონ. ამისთვის საჭიროა, სამართალდამცველებმა ყველაფერი გამოიძიონ და საზოგადოებას სწორი ინფორმაცია მიეწოდოს. მე მზად ვარ, ვითანამშრომლო გამოძიებასთან. ყველა ეჭვს და ბრალდებას საბოლოოდ ბოლო უნდა მოეღოს“, - განაცხადა გუბაზ სანიკიძემ.