საქართველოს მთავარი პროკურატურის გენერალურმა ინსპექციამ ალექსი ბახუტოვის საქმის შესწავლა დაიწყო. ამის შესახებ კახეთის საინფორმაციო ცენტრს მთავარი პროკურატურის პრესსამსახურის ხელმძღვანელმა ხათუნა პაიჭაძემ განუცხადა.
შეგახსენებთ, კახეთის საინფორმაციო ცენტრმა გუშინ გაავრცელა ინფორმაცია, რომ საოლქო პროკურატურის რიგითი პროკურორი ზურაბ ჯავახიშვილი, რომელიც ალექსი ბახუტოვის საქმეზე გამოძიებას ხელმძღვანელობდა, დააწინაურეს და თელავის პროკურორის მოადგილედ დანიშნეს.
ბახუტოვის საქმე საერთაშორისო ორგანიზაციების ანგარიშებში არაერთხელ მოხვდა. მას ლაშა ჩოფიკაშვილის მკვლელობა წამების შედეგად აღიარებინეს. ბახუტოვს თელავის სასამართლომ 6 წლით თავისუფლების აღკვეთა მიუსაჯა, მოგვიანებით კი აღმოჩნდა, რომ ე.წ. „მოკლული“ ცოცხალი იყო. ამის მიუხედავად, ბახუტოვი პატიმრობიდან არ გაათავისუფლეს. პროკურატურამ საქმე განზრახ მკვლელობის მცდელობით გადააკვალიფიცირა და სასამართლომ ბახუტოვს სასჯელი შეუმცირა.
პროკურორის დაწინაურების საკითხზე კომენტირებისას, კახეთის საოლქო პროკურორმა ესტატე მარგებაძემ კახეთის საინფორმაციო ცენტრს განუცხადა, რომ ის ბახუტოვის საქმეს არ იცნობდა. „მე არ ვიცნობდი ბახუტოვის საქმეს. უკვე მოვახსენეთ მთავარ პროკურატურას და მივიღებთ გადაწყვეტილებას. გეთანხმებით, ზურაბ ჯავახიშვილი, რომელსაც ამ საქმეზე უმუშავია, დავაწინაურეთ“, – აღნიშნა მარგებაძემ.
კახეთის საინფორმაციო ცენტრი
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
