2013 წლის 1 თებერვალს, სასტუმრო “ამბასადორში”, სახელმწიფო მინისტრი რეინტეგრაციის საკითხებში პაატა ზაქარეიშვილი საქართველოს სახალხო დამცველთან არსებულ ეთნიკურ უმცირესობათა საბჭოს შეხვდა. შეხვედრას ესწრებოდნენ საქართველოს სახალხო დამცველი უჩა ნანუაშვილი და რეინტეგრაციის საკითხებში სახელმწიფო მინისტრის პირველი მოადგილე ქეთევან ციხელაშვილი.
საბჭოს წევრთა ნაწილმა გამოთქვა სურვილი, რომ შეიქმნას ცალკე დეპარტამენტი, რომელიც უშუალოდ იქნება დაკავებული საქართველოში მცხოვრები ეთნიკური უმცირესობების ინტეგრაციის საკითხებით, ან საბჭო პრემიერ–მინისტრის დაქვემდებარებაში გადავიდეს. სახელმწიფო მინისტრმა განაცხადა, რომ სამინისტროში ფუნქციების გამიჯვნასა და ინტეგრაციის საკითხებზე მომუშავე ცალკე დეპარტამენტის შექმნაზე მუშაობა უკვე დაწყებულია. ხოლო რაც შეეხება საბჭოს სტრუქტურას, პაატა ზაქარეიშვილის მოსაზრებით, საბჭოს სახალხო დამცველის ქოლგის ქვეშ არსებობა ყველაზე მოქნილი მექანიზმია, რადგან ეს ერთი მხრივ საბჭოს დამოუკიდებლობას უნარჩუნებს, მეორე მხრივ კი სახელმწიფო სტრუქტურებთან მჭიდრო თანამშრომლობის საშუალებას აძლევს. ამ მოსაზრებას საბჭოს წევრთა დიდი ნაწილიც დაეთანხმა,
„მოგიწოდებთ, რომ ჩვენი ურთიერთობები უფრო საქმიან რეჟიმში გადავიყვანოთ, მოგვმართეთ წერილობით, დასაბაუთებული მოთხოვნებით და მე ვიქნები ის ადამიანი, რომელიც შუამდგომლობას გაგიწევთ ყველა სამინისტროსთან თქვენი პრობლემებზე დროულად რეაგირების საქმეში“ – განუცხადა პაატა ზაქარეიშვილმა საბჭოს წევრებს.
სახელმწიფო მინისტრის მოადგილემ, ქეთევან ციხელაშვილმა აღნიშნა, რომ სამინისტრომ ორი კვირის მანძილზე შემწყნარებლობისა და სამოქალაქო ინტეგრაციის სამოქმედო გეგმის შესრულების ანგარიშზე უნდა იმუშაოს, ხოლო შემდეგ 1 წლის გეგმა უნდა დაიწეროს, დაწყებულია მუშაობა 2014 წლის ბიუჯეტზეც, აქედან გამომდინარე, მან საბჭოს წევრებს შესთავაზა სამინისტროს მოკლე დროში განახლებული წინადადებებით მიმართონ, რათა სამოქმედო გეგმაშიც და ბიუჯეტში მოხდეს მათი ასახვა.
საბჭოს წევრები შეეხნენ სიძულვილის ენის გამოვლენის, ინფრასტრუქტურული სირთულეების, უმცირესობათა ენებისა და კულტურის შენარჩუნების, უმუშევრობისა და სხვა პრობლემურ საკითხებს. სახელმწიფო მინისტრმა განაცხადა, რომ ყველა ეს საკითხი თანაბრად ეხება საქართველოს მოქალაქეებს, მიუხედავად მათი ეთნიკური კუთვნილებისა და რომ ამ პრობლემების მოსაგვარებლად ყველამ ერთად ღია, დისკუსიებზე დაფუძნებულ და საქმიან რეჟიმში უნდა იმუშაოს.
შეხვედრა ორგანიზებული იყო სახალხო დამცველთან არსებული ტოლერანტობის ცენტრის მიერ, აშშ–ის საერთაშორისო განვითარების სააგენტოს (USAID) მიერ დაფინანსებული საქართველოს გაეროს ასოციაციის (UNAG) პროექტის „ეროვნული ინტეგრაციის გაძლიერება” (ANI) მხარდაჭერით.
ახლო მომავალში საბჭოს წევრები კულტურისა და ძეგლთა დაცვის, განათლებისა და მეცნიერების და იუსტიციის სამინისტროების წარმომადგენლებს შეხვდებიან.
ახალი ამბები
პოპულარული
რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
სპეციალურ პენიტენციურ სამსახურს წამების მსხვერპლის სასარგებლოდ 50 000 ლარის გადახდა დაეკისრა
'ალბათ, ნებისმიერი რეგიონული ჟურნალისტი გეტყვით, რომ გადარჩენისთვის გვიწევს ბრძოლა!'
