სალომე ჩხეიძე
გიგი უგულავას ადვოკატების შუამდგომლობა ბიზნესმენ ჯოზეფ ქეის მოწმეთა სიიდან ამოღების თაობაზე, 3 ივლისს გამართულ წინასასამართლო სხდომაზე მოსამართლემ არ დააკმაყოფილა. სხდომის თავმჯდომარემ დაუშვებელ მტკიცებულებად მხოლოდ ჯოზეფ ქეის 2013 წლის 15 თებერვლის დაკითხვის ოქმი სცნო და განმარტა, რომ დაკითხვა ქალაქ სტამბულში, საკონსულოში ჩატარდა და რადგან საკონსულო არ წარმოადგენს საქართველოს ტერიტორიას, დაკითხვა არ შეიძლება ჩაითვალოს კანონიერად.
შეგახსენებთ, რომ თბილისის ამჟამინდელ მერს, გიგი უგულავას, პროკურატურა საბიუჯეტო თანხებით „ნაციონალური მოძრაობის“ თვალთმაქცურ დაფინანსებას, კერძოდ, შპს "თბილსერვისჯგუფში" ნაციონალური მოძრაობის 750 აქტივისტის დასაქმებასა და მათთვის ხელფასის გადახდას ედავება. საქმის მეორე ეპიზოდი ტელეკომპანია "იმედს" შეეხება და თბილისის მერს სხვისი ქონების მითვისება და უკანონო ლეგალიზაცია ედება ბრალად, რაც პროკურატურის ინფორმაციით, უგულავას მიერ ტელევიზიის კანონიერი მესაკუთრისთვის, ჯოზეფ ქეისთვის ტელეკომპანიის ჩამორთმევაში გამოიხატა.