„ევროპა ჩვენი სახლია“ ქუთაისის მერს უპირისპირდება

შორენა კაკაბაძე, იმერეთი 

„მერიის თანამშრომლები დაკისრებული მოვალეობების შესრულებით უნდა იყვნენ დაკავებული და არა ქუჩაში, სხვადასხვა აქციებზე სირბილით. არ შეიძლება საჯარო მოხელე სამუშაო საათებში ქუჩაში იდგეს და ვიღაცის, თუნდაც ხელისუფლების წარმომადგენელთა ინტერესს გამოხატავდეს“, - ამ განცხადებით არასამთავრობო ორგანიზაციის - „ევროპა ჩვენი სახლია“ წარმომადგენელმა თორნიკე ბარათაშვილმა საგანგებოდ გამართულ ბრიფინგზე ქუთაისის მერიაში მიმდინარე მოვლენები გააპროტესტა.

იგი მიმდინარე წლის 19 დეკემბერს, წყალტუბოს მუნიციპალიტეტის ტერიტორიაზე მდებარე ავტომაგისტრალის საზეიმო გახსნის ცერემონიაზე ქუთაისის მერიიდან, ასევე, ააიპ გაერთიანებებიდან ავტობუსებით ჩაყვანილი თანამშრომლების ფაქტს ეხმიანება და ამბობს, რომ ეს პირველი შემთხვევა არაა.

„ჩვენ აღნიშნული ფაქტის გამოძიებას ვითხოვთ. ასევე, მოვითხოვთ ჩატარდეს ქუთაისის მერიის, ასევე, ააიპ გაერთიანებების თანამშრომელთა მონიტორინგი. აღნიშნული ფაქტების ამსახველ დოკუმენტაციას კი, ჩვენ საერეთაშორისო ორგანიზაციებს NDI-ს და IRI-ს გავუგზავნით, რომლებიც მსგავსი ფაქტებით ინტერესდებიან“, - ამბობს თორნიკე ბარათაშვილი, რომელიც მომხდარში ქუთაისის მერს შოთა მურღულიას ადანაშაულებს.