დღეს პარლამენტის დროებითი საგამოძიებო კომისიის თავმჯდომარე სერგი კაპანაძე და წევრები - ოთო კახიძე და ელენე ხოშტარია ადამიანის უფლებათა ცენტრის აღმასრულებელ დირექტორს, ალეკო ცქიტიშვილს და იურისტ ნესტან ლონდარიძეს შეხვდნენ. შეხვედრა ადამიანის უფლებათა ცენტრის ოფისში გაიმართა.
ადამიანის უფლებათა ცენტრი იცავს ხორავას ქუჩაზე მომხდარი მკვლელობის საქმეზე დაზარალებულ ზაზა სარალიძის ინტერესებს.
პარლამენტის დროებითი საგამოძიებო კომისიის წარმომადგენლებმა ზაზა სარალიძის უფლებების დამცველებს კომისიის მიზნები და გეგმები გააცნეს. ადამიანის უფლებათა ცენტრმა გამოხატა სრული მზაობა, ყოველმხრივ შეუწყოს ხელი საპარლამენტო გამოძიებას.
ზაზა სარალიძის ადვოკატი ნესტან ლონდარიძე აქტიურად ითანამშრომლებს კომისიასთან ყველა იმ საკითხზე, რაზეც დაზარალებულ მხარეს აქვს კითხვები.
ადამიანის უფლებათა ცენტრის აღმასრულებელი დირექტორი დღეს დროებითი საგამოძიებო კომისიის თავმჯდომარესთან არასამთავრობო ორგანიზაციების ხელმძღვანელებთან შეხვედრაშიც მიიღებს მონაწილეობას.
ადამიანის უფლებათა ცენტრი