სიკვდილის ზონა რუსთავში - კამპანია 'იცურე მშვიდად' გრძელდება

9 ოქტომბერს კამპანია „იცურე მშვიდად“ მონაწილე ორგანიზაციებმა მორიგი აქცია გამართეს ქალაქ რუსთავში, მე-11 და მე-12 მიკრორაიონების მიმდებარედ, ჰესთან არსებულ დაჭაობებულ წყალსაცავთან, ერთ-ერთ ყველაზე საშიშ ადგილას, სადაც წარსულში ადამიანების დახრჩობის არაერთი შემთხვევაა დაფიქსირებული.

წყალსაცავის ნაპირზე ერთმანეთის გვერდით ნახავთ ბანაობის ამკრძალავ ბანერს და წყალსაცავში დამხრჩვალი ადამიანის ხსოვნის საპატივცემულოდ აღმართულ ჯვარს. ეს სურათი  გვიჩვენებს, რომ მსგავს საშიშ ადგილებზე მხოლოდ ამკრძალავი ბანერების დამონტაჟება საკმარისი არ არის და ხშირად აუცილებელია, წყლის ობიექტი დაცული იყოს სპეციალური ბარიერებით.  

ქალაქ რუსთავში არსებული წყალსაცავი მიმზიდველი ადგილია მეთევზეებისთვის. ხშირად აქ ბავშვებიც თევზაობენ ან ბანაობენ. მოზარდის დახრჩობის ერთ-ერთი შემთხვევა გაშუქებულია სტუდია „მონიტორის“ საგამოძიებო ფილმში - „სიკვდილის ზონები საქართველოში“. 

წყალსაცავის წყლით სარგებლობენ ადგილობრივი მწყემსებიც. აქ ხშირად ნახავთ ცხვრის ფარას და მსხვილფეხა პირუტყვის ნახირს. პირუტყვის მიერ წყალსაცავის მიმდებარე ტერიტორია დაბინძურებულია და ამ მხრივაც, საჭიროა მუნიციპალიტეტმა გაატაროს ზომები, რათა დაცული იყოს არა მარტო უსაფრთხოების, არამედ ჰიგიენურ-სანიტარიული სტანდარტები.  

იმ ქმედებებს შორის, რაც უნდა განხორციელდეს დახრჩობით გამოწვეული სიკვდილიანობის პრევენციისათვის, მსოფლიო ჯანდაცვის ორგანიზაცია ასახელებს, ერთი შეხედვით, მარტივ, დაბალბიუჯეტიან, მაგრამ პრევენციისთვის ეფექტიან ისეთ ნაბიჯებს, როგორიცაა, მათ შორის: ბარიერების დამონტაჟება წყალთან მისასვლელობის/მისაწვდომობის გასაკონტროლებლად.

კამპანია „იცურე მშვიდად“ წელს დაიწყო ანა დოლიძის, ადამიანის უფლებათა ცენტრის, CENN-ის და პროგრესის ცენტრის ინიციატივით. კამპანიის მიზანია ხელისუფლების პასუხისმგებლობის გაზრდა და საზოგადოების ცნობიერების ამაღლება.

სექტემბრიდან კამპანიას „იცურე მშვიდად“ მხარს უჭერს ღია საზოგადოების ფონდი, რომლის დახმარებითაც შესაძლებელია სხვადასხვა აქციებისა და ადვოკატირების აქტივობების განხორციელება როგორც თბილისში, ისე საქართველოს სხვადასხვა რეგიონში.