04:06, Tuesday, 17.09.2019
YouTube
Twitter
Facebook
RSS
ქართული English

პორტალი ადამიანის უფლებების შესახებ

Go
გაფართოებული ძიება

ბიზნესმენ დავით ადეიშვილის საქმეზე ადამიანის უფლებათა ცენტრმა ადამიანის უფლებათა ევროპულ სასამართლოს საჩივრით მიმართა

22.05.2019

 
ადამიანის უფლებათა ცენტრმა ბიზნესმენ დავით ადეიშვილის ქონების იძულებით დათმობის საქმეზე, დარღვეული უფლებების აღსადგენად, ადამიანის უფლებათა ევროპულ სასამართლოს საჩივრით მიმართა. 

ადამიანის უფლებათა ცენტრი მიიჩნევს, რომ დავით ადეიშვილის საქმეში დაფიქსირდა ადამიანის უფლებათა ევროპული კონვენციის მე-3, მე-6, მე-8, მე-13 და კონვენციის I დამატებითი ოქმის, I მუხლის შესაძლო დარღვევა. სახელმწიფომ ეფექტიანად ვერ უზრუნველყო, გამოეძიებინა წინა ხელისუფლების პერიოდში, 2009 წელს, დავით ადეიშვილის მიმართ განხორციელებული წამება და არაადამიანური მოპყრობა, რამაც მნიშვნელოვანი კვალი დატოვა მის ჯანმრთელობაზე. სახელმწიფომ დღემდე ვერ უზრუნველყო პირის დაზარალებულად ცნობა. 

ადეიშვილის საქმეში დაირღვა სამართლიანი სასამართლოს უფლება. მომჩივნის პირადი და ოჯახის ხელშეუხებლობის უფლება დღემდე საფრთხის ქვეშაა. მნიშვნელოვანი ზიანი ადგება მისი საკუთრების უფლებას, რაც წარმოადგენს არაეფექტიანი გამოძიების შედეგს.

სახელმწიფომ ვერ უზრუნველყო ობიექტური გამოძიებისა და დაცვის მექანიზმი, რომელიც მიმართული იქნებოდა მიუკერძოებელი გამოძიებისა და სამართლიანი შედეგის დადგომისაკენ.

დავით ადეიშვილის სამართლებრივ ინტერესებს ადამიანის უფლებათა ცენტრი იცავს. 

ისტორია: 
დავით ადეიშვილი იყო შპს „ლეონის“ 50% წილის მფლობელი და ამავე კომპანიის დირექტორი. კომპანია ეწეოდა საყოფაცხოვრებო  ტექნიკის მწარმოებელი რამდენიმე მოწინავე სავაჭრო კომპანიის (SONY, YAMAHA) საქონლის იმპორტისა და დისტრიბუციის ორგანიზებას. კომპანიის წლიური ბრუნვა შეადგენდა  დაახლოებით  3 მილიონ აშშ დოლარს.

2009 წლის 20 აგვისტოს გვიან ღამით დავით ადეიშვილის საცხოვრებელ სახლში გამოცხადდნენ ფინანსთა სამინისტროს შემოსავლების სამსხურის ფინანსური პოლიციის  თანამშრომლები, რომლებმაც მას სთხოვეს, გაყოლოდა ფინანსურ პოლიციაში.  მისვლისთანავე ადეიშვილი დაკითხეს და წაუყენეს ბრალად თაღლითობა, ხოლო შემდგომ - კრედიტის მოტყუებით  მიღება (სსკ-ის 208-ე მუხლი). 

ფინანსურმა პოლიციამ, თაღლითურად, მოტყუების გზით, დავით ადეიშვილის ბიზნესპარტნიორის - ე.ე.-ს დახმარებით, რომელიც აღმოჩნდა ფინანსური პოლიციის იმჟამინდელი ხელმძღვანელის ნათესავი, მოტყუებით გადაიფორმა შპს „ლეონის“ 100% წილი.

დავით ადეიშვილი, რომელსაც ბრალი დასდეს თაღლითობაში, თავად აღმოჩნდა  ფინანსური პოლიციისა და პროკურატურის მხრიდან თაღლითობის მსხვერპლი. წაყენებული   ბრალდებები აბსურდული იყო თავიდანვე, საქმეში არ მოიპოვებოდა არათუ პირდაპირი, ირიბი მტკიცებულებაც კი. მთელი 9 თვის განმავლობაში დავით ადეიშვილი არ აღიარებდა წაყენებულ ბრალს. ამის გამო, მასთან №8 სასჯელაღსრულების დაწესებულებაში შევიდა ორი პირი, რომლებიც დაემუქრენ მას, რომ თუ არ მოაწერდა ხელს საპროცესო შეთანხმებას, მის ორ ვაჟს შეუქმნიდნენ პრობლემებს. 

საგამოძიებო ორგანოს მხრიდან დავით ადეიშვილის მიმართ წარმართულ უკანონო საგამოძიებო მოქმედებებს ხელმძღვანელობდა საქმის გამომძიებელი პროკურორი, ირაკლი შოთაძე, რომელიც შემდგომში დაინიშნა საქართველოს მთავარ პროკურორად. 

მუქარა დავით ადეიშვილმა აღიქვა რეალურად, რის შემდეგაც მოაწერა ხელი საპროცესო შეთანხმებას  და გადაიხადა  ჯარიმა 30  000 ლარის ოდენობით.

2013  წლის 5 თებერვალს, დავით ადეიშვილის განცხადების საფუძველზე, ქ.თბილისის პროკურატურაში დაიწყო გამოძიება სისხლის სამართლის №010050413803 საქმეზე - საქმის გამოძიებისას საგამოძიებო მოხელეთა მხრიდან სამსახურებრივი უფლებამოსილების ბოროტად  გამოყენების ფაქტზე, დანაშაული გათვალისწინებული სსკ-ის 332-ე მუხლის I ნაწილით. პროკურატურაში 5 წელია, მიმდინარეობს გამოძიება, მაგრამ დღემდე არავინ მიუციათ პასუხისგებაში. ადამიანის უფლებათა ცენტრს მიაჩნია, რომ არაეფექტიანი გამოძიება უკავშირდება ყოფილი მთავარი პროკურორის, ირაკლი შოთაძის გავლენას საგამოძიებო პროცესზე, რომელიც თავის დროზე მონაწილეობდა დავით ადეიშვილის მიმართ განხორციელებულ უკანონო მოქმედებებში.

ვინაიდან 2019 წლის იანვარში დავით ადეიშვილს, სასამართლოს განჩინებით, საბოლოოდ ეთქვა უარი დაზარალებულად ცნობაზე და გამოძიება დღემდე არაეფექტიანად გრძელდება, ადამიანის  უფლებათა ცენტრმა დარღვეული უფლებების აღსადგენად საჩივრით მიმართა ადამიანის უფლებათა ევროპულ სასამართლოს.

                                                                                                      ადამიანის უფლებათა ცენტრი

Print Send to Friend Send to Facebook Tweet This
დატოვეთ თქვენი კომენტარი
თქვენი სახელი:
თქვენი კომენტარი:

ქართულად
დამცავი კოდი: Code
სხვა სიახლეები
გამოკითხვა
მხარს უჭერთ თუ არა სავალდებულო დაგროვებით საპენსიო სისტემას?
დიახ არა თავს შევიკავებ პასუხის გაცემისგან

ბლოგი

გორაშვილი vs ნაჭყებია
ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის ლექტორმა, გიორგი გორაშვილმა ამავე ფაკულტეტის სტუდენტს ბუბა ნაჭყებიას ფეისბუქის დახურულ ჯგუფში გინების გამო უჩივლა.
ვრცლად...
სიკვდილით სავსე ქალაქი
უგზო-უკვლოდ დაკარგულები - „არ დამივიწყო!“
არქივი
  

       

რედაქტორის აზრი

ხელისუფლებისგან მივიწყებული ვეტერანები
ყოველწლიურად მცირდება მეორე მსოფლიო ომის მონაწილეთა რაოდენობა. მათ შესახებ კი საზოგადოება მხოლოდ 9 მაისს იღებს ინფორმაციას, როდესაც ომის ვეტერანები, ტრადიციულად, გამარჯვების პარკში იკრიბებიან
ვრცლად...
უიმედოთა სოფელი
რა დაემართა სამართლიანობის აღდგენის ოცნებას
არქივი
თემები
კატეგორიები

Copyright © 2004 - 2019 HRIDC