ადამიანის უფლებათა დარღვევა გრძელდება
ასლან აბაშიძის ტყვეობიდან ევროსასამართლოს წყალობით გათავისუფლებული თენგიზ ასანიძე აცხადებს, რომ ირღვევა ადამიანის უფლებები, რადგან ადამიანმა სასჯელი უნდა მოიხადოს სასამართლოს მიერ დადგენილ პირობებში. საქმე ეხება იმ 12 პატიმარს, რომლებიც სასჯელს ხელვაჩაურის პოლიციის უფროსის - ვაჟა გოგიტიძის მკვლელობის გამო იხდიან. ისინი გაასამართლეს 1994 წელს და სასჯელს იქ იხდიან, სადაც არ უნდა იხდიდნენ. მისი განმარტებით, ამ ადამიანებმა სასჯელი გაძლიერებული რეჟიმის კოლონიაში უნდა მოიხადონ და არა იზოლატორის შენობაში, სადაც პატიმრებს არაადამიანურ, გაუსაძლის პირობებში უწევთ ყოფნა.
თენგიზ ასანიძე აცხადებს, რომ ამ საკითხზე ყურადღებას მხოლოდ ქვეყნის სათავეში ახალი ხელისუფლების მოსვლის შემდეგ ამახვილებენ და იმედით უყურებს ამ ადამიანების კოლონიაში გადაყვანის საკითხს. იგი ფიქრობს, რომ მათ შეეძლებათ ჩვენების განმეორებით მიცემა და საქმეში ახალი გარემოებები ამოტივტივდება, რაც საქმის ხელახალი გადახედვის საშუალებას იძლევა. ასანიძეს მიაჩნია, რომ სწორედ ამის გამო აყოვნებს ასლან აბაშიძე ამ ადამიანებს იზოლატორში.