ბათუმის პოლიციის ყოფილი უფროსი დააკავეს
აჭარელმა სამართალდამცავებმა ბათუმის პოლიციის ყოფილი უფროსის და „ჩვენი აჭარის“ აქტივისტის თამაზ ხოზრევანიძის სახლი გაჩხრიკეს, რის შედეგადაც მათ მის ბაღში ავტომატი და ტყვიები იპოვეს, ხოლო ხოზრევანიძე კი შუახევის პოლიციაში გადაიყვანეს.
ბათუმის პოლიციის ყოფილი უფროსის ოჯახის წევრები აცხადებენ, რომ დაკავებულს ავტომატი თავად პოლიციელებმა ჩაუდეს. რაც შეეხება ტყვიებს, ხოზრევანიძეს მათი ჩაბარება უნდოდა, მაგრამ თბილისში მკურნალობის გამო ვერ მოახერხა. ისინი აცხადებენ, რომ ხოზრევანიძის დაკავება პოლიტიკური მოტივით მოხდა, რადგან ის „ჩვენი აჭარის“ აქტივისტი იყო და ხშირად ჩნდებოდა ბათუმის ოფისში.
გუშინ „ჩვენი აჭარის“ ოფისთან მშვიდობიანი აქცია ამ ორგანიზაციის ქალთა კავშირმა გამართა. ისინი აჭარაში ადამიანის უფლებათა დარღვევების აღმოფხვრას და საგანგებო სიტუაციის გაუქმებას მოითხოვდნენ.