მირცხულავას საქმე სასამართლოში განიხილება
სათბობ-ენერგეტიკის ყოფილი მინისტრის დავით მირცხულავას მიმართ აღძრული საქმე გენერალურმა პროკურატურამ განსახილველად თბილისის კრწანისი-მთაწმინდის რაიონულ სასამართლოში გააგზავნა. ყოფილ მინისტრს, რომლის მიმართ აღძრული საქმის გამოძიება 7 თვის მანძილზე გრძელდებოდა, ბრალად ედება სამსახურეობრივი უფლებამოსილების ბოროტად გამოყენება, რასაც ეთანადება 3-დან 8 წლამდე პატიმრობა, თაღლითობაში მონაწილეობა (5-დან 10 წლამდე პატიმრობა) და დოკუმენტის მისაკუთრება (1 წლამდე პატიმრობა). საბრალდებო დასკვნის თანახმად, მირცხულავამ მონაწილეობა მიიღო სომხური ენერგოკომპანიების მიმართ 6 მლნ. 700 ათასი აშშ დოლარის დავალიანების აღიარებასა და ამ თანხის შუამავალი კომპანიისთვის გადარიცხვაში. თანხა ადრესატამდე არ მისულა და საქართველოს სომხეთის ვალი დარჩა. მირცხულავა თავს არ ცნობს დამნაშავედ და სადავო თანხის გადახდას არ აპირებს. მან საპასუხოდ საქართველოს ხელისუფლებას სტრასბურგის სასამართლოში უჩივლა.