პატიმრებს სხეულზე დაზიანება აღენიშნებათ
ზუგდიდი.07.09.04. მედია-ნიუსი. სახალხო დამცველის აპარატის ზუგდიდის რეგიონული წარმომადგენლობის წევრებმა ზუგდიდის №4 საპყრობილეში რამდენიმე პატიმარი მოინახულეს.
როგორც სააგენტო „მედია ნიუსს“ ზუგდიდის რეგიონული წარმომადგენლობიდან აცნობეს, პატიმრებს სხეულზე სხვადასხვა სახის დაზიანება აღენიშნებათ, რაც მათ დაკავებისას და შემდგომ მიიღეს.
მათი თქმით, ნაწამებია ხუთი დაკავებული: ე. ფ., ლ. ძ., ზ. ყ., გ. ქ. და გ. ფ. ამ უკანასკნელის შესახებ არსებობს ექსპერტიზის დასკვნა.
რეგიონული წარმომადგენლის განცხადებით, ამ ფაქტთან დაკავშირებით გენპროკურატურისა და საოლქო პროკურატურის სახელზე მომზადდება შუამდგომლობა, რათა აღიძრას სისხლის სამართლის საქმე იმ პირების მიმართ, ვინც პატიმრები აწამა.