ეკონომიკის მინისტრის შეურაცხყოფის თვითმხილველი ჯერ-ჯერობით ვერავინ დაკითხეს
თბილისი.13.10.04.მედია-ნიუსი. თბილისის კრწანისი-მთაწმინდის სასამართლოში ექს-პრეზიდენტ ზვიად გამსახურდიას ხელისუფლების მომხრეთა სასამართლო პროცესზე ორი პოლიციელი დაკითხეს, რომლებიც აცხადებენ, რომ 20 ივლისს ეკონომიკის სამინისტროსთან გამართულ აქციაზე მომხდარ ინციდენტს არ შესწრებიან.
კრწანისი-მთაწმინდის რაიონულ სასამართლოში თამაზ წიკლაურს, ირაკლი შონიასა და არასრულწლოვან ლაშა ქაცანაშვილს ასამართლებენ. მათ ხულიგნობაში ედებათ ბრალი. ბრალდების თანახმად, აღნიშნულმა პირებმა შეურაცხყოფა მიაყენეს ეკონომიკის მინისტრ კახა ბენდუქიძეს, რომელიც პრივატიზაციის შეჩერების მოთხოვნით გამართული აქციის მონაწილეებთან გასაუბრებას ცდილობდა.
სასამართლო პროცესი 19 ოქტომბერს მოწმეთა დაკითხვით განახლდება.