იმერეთის მხარეში პატიმრების წამების ფაქტებმა იმატა
ქუთაისი 21.10.04. მედია ნიუსი. არასამთავრობო ორგანიზაცია ’’თავისუფლების ინსტიტუტის’’ ინიციატივით ქუთაისში მრგვალი მაგიდა მოეწყო, რომელიც დაკავებულთა წამების და ცემის ფაქტების განხილვას მიეძღვნა.
ვარდების რევოლუციის შემდეგ სტატისტიკური მონაცემებით, ქუთაისის იზოლატორში ნაწამები პატიმრების რიცხვმა 60-ს გადააჭარბა, თუმცა არცერთ ფაქტზე არ აღძრულა სისხლის სამართლის საქმე,-აცხადებენ არასამთავრობოები.
დისკუსიაში მონაწილეობდნენ აგრეთვე ქუთაისის პოლიციის უფროსი, პროკურორი და არასამთავრობო ორგანიზაციები.
"იმერეთის ყველა რაიონის პოლიციის განყოფილებებში ცემენ დაკავებულებს, მაგალითად ზ. ქ. იმერეთისა და ქუთაისის სამმართველოს თანამშრომლებმა ერთობლივად დააკავეს და დაკავების ადგილზე სცემეს. ქ.ს ორი ნეკნი აქვს ჩამტვრეული", -აცხადებს თავისუფლების ინსტიტუის წარმომადგენელი ნინო ღაჭავა.
"არ გამოვრიცხავ ძალადობის ფაქტებს ჩემს საკურატორო ზონაში, მაგრამ ყველა ფაქტზე ტარდება შემოწმება",- აცხადებს ქუთაისის პროკურორი ჯუმბერ ლელაძე.