ჟურნალისტის გიორგი სანაიას მკვლელობის ახალი მოტივი
თბილისი.24.11.04.მედია-ნიუსი. 24 ნოემბერს უზენაესი სასამართლოს სისხლის სამართლის საკასაციო პალატამ გიორგი სანაიას ქვრივის საკასაციო საჩივარი განიხილა და გადაწყვეტილებას 3 დეკემბერს გამოაცხადებს.
გიორგი სანაიას ქვრივი ხათუნა ჩხაიძე უზენაესი სასამართლოს სისხლის სამართლის საკასაციო პალატას სისხლის სამართლის საქმის ხელახალ გამოძიებაში დაბრუნებას და მკვლელობის შემკვეთის ვინაობის დადგენას ითხოვს.
გიორგი სანაიას მკვლელობისთვის მსჯავრდებულ გრიგოლ ხურცილავას ადვოკატი კი თავის მხრივ, ხურცილავასთვის 13-წლიანი პატიმრობის შემსუბუქებას ითხოვს, რადგან მიაჩნია, რომ მსჯავრდებულმა დანაშაული აფექტის მდგომარეობაში ჩაიდინა.
გიორგი სანაიას მკვლელობისთვის მსჯავრდებულ გრიგოლ ხურცილავას თბილისის გლდანი-ნაძალადევის რაიონულმა სასამართლომ 2004 წლის ივნისში13-წლიანი პატიმრობა მიუსაჯა. მოგვიანებით, 30 ივლისს, საოლქო სასამართლომ განაჩენი ძალაში დატოვა და მხოლოდ მკვლელობის მოტივი დააკონკრეტა.
საოლქო სასამართლომ მკვლელობის მოტივად მსხვერპლის მხრიდან მსჯავრდებულის სექსუალური შეურაცხყოფის მცდელობა მიიჩნია.