პოლიციის საქმიანობას მონიტორინგს საზოგადოებრივი საბჭო გაუწევს
თბილისი.21.12.04.მედია-ნიუსი. 23 დეკემბერს შინაგან საქმეთა სამინისტროში პოლიციის მონიტორინგის საზოგადოებრივი საბჭოს პრეზენტაცია გაიმართება.
სახალხო დამცველი სოზარ სუბარი ოფიციალურად გადასცემს რწმუნებებს იმ პირებს, რომლებსაც შეეძლებათ მონიტორინგის მიზნით ნებისმიერ დროს შევიდნენ პოლიციის წინასწარი დაკავების იზოლატორებსა და პენიტენციალური სისტემის ყველა დაწესებულებაში.
საბჭოს წევრები სახალხო დამცველის ნდობის მანდატით ისარგებლებენ. მათი სიები წინასწარ გადაეგზავნა შსს-ს იმისთვის, რომ გადაემოწმებინა, იყვნენ თუ არა ეს პირები ნასამართლევნი და ჰქონდათ თუ არა ნათესაური კავშირი პენიტენციალური სისტემის თანამშრომლებთან.
ოფიციალურ წარდგენას დაესწრებიან შინაგან საქმეთა მინისტრი ვანო მერაბიშვილი და გენერალური პროკურორი ზურაბ ადეიშვილი.