ტრეფიკინგის წინააღმდეგ ორწლიანი პროგრამა დაიწყო
არასამთავრობო ორგანიზაცია ადამიანის უფლებათა საინფორმაციო და სადოკუმენტაციო ცენტრი პარტნიორ ორგანიზაციასთან მშვიდობის კვლევისა და მოქმედების ცენტრი (საბერძნეთი) ერთად ამა წლის თებერვლიდან ახორციელებს ორწლიან პროექტს „შევაჩეროთ ტრეფიკინგი“ (STOPNOW).
პროექტი, რომელიც ორ წელზეა გათვლილი, დაფინანსებულია საერთაშორისო ეკონომიკური ურთიერთობებისა და განვითარების თანამშრომლობის გენერალური სამდივნოს მიერ (საბერძნეთის საგარეო საქმეთა სამინისტრო).
საქართველოსთან ერთად პროექტი მოლდოვაში, ბელორუსიასა და სომხეთშიც განხორციელდება.
როგორც ადამიანის უფლებათა საინფორმაციო და სადოკუმენტაციო ცენტრის ხელმძღვანელმა უჩა ნანუაშვილმა გუშინ გამართულ შეხვედრაზე განაცხადა, პროექტის - „შევაჩეროთ ტრეფიკინგი“ - მიზანია ადამიანთა ტრეფიკინგის წინააღმდეგ ბრძოლა და პრევენცია; განსაკუთრებით კი ბრძოლა, რათა აღმოიფხვრას ტრეფიკინგი ქალთა მიმართ სექსუალური და ეკონომიკური ექსპლოატაციის მიზნით. ასევე მსხვერპლთა დახმარება; საზოგადოებრივი ცნობიერების ამაღლება და განათლება აღნიშნულ სფეროში.
აღნიშნული პროექტი (STOPNOW) ბერძნულმა ორგანიზაციამ მშვიდობის კვლევისა და მოქმედების ცენტრმა პირველად 2001 წლის დეკემბერში დაიწყო საბერძნეთში, უკრაინასა და ალბანეთში, რომლის ძირითად ამოცანას წარმოადგენს ტრეფიკინგის პრევენცია და ტრეფიკინგის მსხვერპლთა დახმარების უზრუნველყოფა საზოგადოებაში რეინტეგრაციის შესამსუბუქებლად (დაწვრილებითი ინფორმაცია შეგიძლიათ იხილოთ შემდეგ მისამართზე www.stop-trafficking.org).
პროექტის ფარგლებში გათვალისწინებულია საინფორმაციო შეხვედრები და მრგვალი მაგიდები საერთაშორისო, სამთავრობო და არასამთავრობო ორგანიზაციათა წარმომადგენელთათვის, რომლებიც მუშაობენ აღნიშნულ სფეროში;
ტრენინგები სოციალურად დაუცველი ქალებისათვის, სტუდენტების, ჟურნალისტებისა და არასამთავრობო სექტორის წარმომადგენელთათვის; იურიდიული კონსულტაციები და დახმარება; ბუკლეტებისა და სხვა პუბლიკაციების გამოცემა და დარიგება; ასევე საინფორმაციო მონაცემთა ბაზისა და საიტის შექმნა. პროექტის მიმდინარეობის პერიოდში ორგანიზაცია მოამზადებს ანგარიშს.
ადამიანის უფლებათა საინფორმაციო და სადოკუმენტაციო ცენტრი თანამშრომლობისაკენ მოუწოდებს სამთავრობო და არასამთავრობო ორგანიზაციებს, ასევე საერთაშორისო ორგანიზაციებს, რომლებიც მუშაობენ აღნიშნულ საკითხზე.
უჩა ნანუაშვილის თქმით, არასამთავრობოები აპირებენ ერთობლივი ძალისხმევით ახლახან მიღებული ტრეფიკინგის წინააღდეგ ბრძოლის 2005-2006 წლების სამოქმედო გეგმის შესრულებაზე მონიტორინგი განახორციელონ და ლობირება გაუწიონ პარლამენტის მიერ ტრეფიკინგის კუთხით არსებული საერთაშორისო კონვენციის რატიფიკაციას.