სახელმწიფო კანცელარიასთან ჭიათურელები შიმშილობენ
თბილისი.03.08.05.მედიანიუსი. ჭიათურის მაცხოვრებლები თერთმეტი დღეა თბილისში, სახელმწიფო კანცელარიასთან, საპროტესტო აქციებს მართავენ. სამი დღის წინათ კი აქციის შვიდმა მონაწილემ შიმშილობა დაიწყო.
ჭიათურის 500-მდე მაცხოვრებელს მანგანუმის წარმოებისას მიმდინარე სამუშაოებმა საცხოვრებელი სახლები დაუზიანა. უსახლკაროდ დარჩენილი მოსახლეობა სახელმწიფოსგან ფულადი კომპენსაციის სახით 2 300 000 დოლარს ითხოვს.
საპროტესტო აქციის მონაწილეები აცხადებენ, რომ უკანასკნელი 8 თვის მანძილზე მათ აღარც ყოველთვიური პროცენტი (50-დან 100 ლარამდე) მიუღიათ.
აქციის მონაწილეებს სახელმწიფო კანცელარიიდან შიდა პოლიტიკისა და ინსტიტუციური მოწყობის სამსახურის უფროსი კობა ხაბაზი შეხვდა და დახმარებას დაჰპირდა.
აქციის მონაწილეები დაშლას არ აპირებენ.